سوپای ئوردن: درۆنێکمان خستە خوارەوە لە سووریاوە هاتبوو

 

رۆژی هەینی، 16-6-2023، فەرماندەیی گشتی هێزە چەکدارەکانی ئوردن لە راگەیێندراوێکدا لەبارەی خستنەخوارەوەی فڕۆکەیەکی بێفڕۆکەوان (درۆن)ەوە لەسەر زاری سەرچاوەیەکی ئەو فەرماندەییەوە رایگەیاند: "هێزەکانی پاسەوانی سنوور بەهاوئاهەنگی لەگەڵ دەزگا هەواڵگرییە سەربازییەکان  چاودێریی فڕۆکەیەکی بێفڕۆکەوانیان کردووە کە بەشێوەیەکی نایاسایی لە خاکی سووریاوە هاتبووە خاکی ئوردنەوە و لەنێو خاکی ئوردن خرایە خوارەوە."

 

سەرچاوەکە راشیگەیاندووە، دوای پشکنین دەرکەوتەوە درۆنەکە ژمارەیەک پارچە چەکی هەڵگرتووە و دواتر ئەوانەی دەستیان بەسەردا گیرابوو رەەوانەی لایەنە پەیوەندیدارەکان کران.

 

فەرماندەیی گشتی هێزە چەکدارەکانی ئوردن هۆشداری دەدات و دەڵێت: "هێزە چەکدارەکان زۆر بە تووندی رەفتار لەگەڵ هەر هەڕەشەیەک دەکەن کە لە سنوورەکاندا هەبێت، یان هەر هەوڵێک بۆ تێکدانی ئاسایشی ئوردن و تۆقاندنی هاووڵاتیانی ئەو وڵاتە لە ئارادا بێت."

 

لەدوای رووداوەکانی سووریا لە ساڵی 2011ەوە ئەو وڵاتە بەسەر چەندین ناوچەی دەسەڵات دابەشبووە و بەشێک لە ناوچەکانی هێشتا لەلایەن گرووپە توندئاژۆکان و بەشێکی لەلایەن هێزەکانی تورکیا و ئێرانەوە بەڕێوەدەبرێت، جگە لەوەی هێزەکانی ئەمریکا و رووسیا لەو وڵاتە هەن.

 

سووریا پەیوەندییەکانی خۆی لەگەڵ بەشێک لە وڵاتان ئاسایی کردووەتەوە و رۆژی یەکشەممە، 7-5-2023، وەزیرانی دەرەوەی وڵاتانی ئەندام لە کۆمکاری عەرەبی، بڕیاریاندا کۆتایی بە هەڵپەساردنی ئەندامێتیی سووریا لە کۆمکارەکە بهێنن و لە دواهەمین لووتکەی کۆمکاری عەرەبی کە لە 19-5-2023، لە شاری جەددەی سعودیە بەڕێوەچوو، بەشار ئەسەد بەشداری کرد.