نەتەنیاهوو: 90٪ـی کۆگای مووشەکی حیزبوڵڵامان وێران کردووە و ئامانجمان هەڵوەشاندنەوەی گرووپەکەیە

 

 

نەتەنیاهوو لە گوتەیەکدا ئاماژەی بەوە کرد، لەسەر داوای دۆناڵد ترەمپ، سەرۆکی ئەمریکا، رازی بوون بە ئاگربەستێکی کاتی لە لوبنان بۆ ئەوەی دەرفەتێک بە چارەسەری سیاسی و سەربازیی یەکگرتوو بدەن. 

 

سەرۆکوەزیرانی ئیسرائیل گوتی: "بۆ یەکەمجار لە 43 ساڵدا، نوێنەرانی ئیسرائیل راستەوخۆ لەگەڵ نوێنەرانی لوبنان قسە دەکەن. رێگەی ئاشتی درێژە، بەڵام تازە دەستمان پێکردووە."

 

 

سەرۆکوەزیرانی ئیسرائیل تیشکی خستە سەر ئەو دەستکەوتانەی لە باکووری وڵاتەکەی بەدەستیان هێناون و رایگەیاند، توانیویانە هەردوو هەڕەشەی "نزیک و دوور" لەنێو ببەن. 

 

بە گوتەی نەتەنیاهوو، هەڕەشە نزیکەکە دزەکردنی چەکداران و تەقاندنی مووشەکی دژەتانک بوو، هەڕەشە دوورەکەش ئەو 150 هەزار مووشەک و رۆکێتە بوو کە حەسەن نەسروڵڵا بۆ وێرانکردنی شارەکانی ئیسرائیل ئامادەی کردبوون.

 

نەتەنیاهوو گوتی، ئیسرائیل بۆ یەکەمجار ناوچەیەکی جیاکەرەوەی ئەمنیی قووڵی لە تەواوی سنووری باکوور، لە لوبنانەوە تاوەکو بەرزاییەکانی گۆلان و یەرمووک دروست کردووە و گوتی: "ئەوان دەیانویست بە بازنەیەکی ئاگر گەمارۆمان بدەن، بەڵام ئێمە بازنەیەکی ئاسایشمان دروست کرد."

 

 

سەبارەت بە زیانەکانی حیزبوڵڵا، نەتەنیاهوو گوتی، 90٪ـی کۆگاکانی مووشەک و رۆکێتی ئەو گرووپەیان وێران کردووە و گوتی: "خودی نەسروڵڵامان لەنێوبرد، بە ئامێرەکانی پەیجەر تووشی شۆکمان کردن و هەزاران چەکداریشیان لێ کوژرا."

 

نەتەنیاهوو، حیزبوڵڵای ئێستای بە "سێبەرێکی لاواز" چواند بەراورد بە رابردوو.

 

سەرۆکوەزیرانی ئیسرائیل رایگەیاند، هێشتا کارەکەیان تەواو نەبووە و پلانیان بۆ هەڕەشە مووشەکی و درۆنییە ماوەکان هەیە.

 

نەتەنیاهوو گوتی، ئامانجیان هەڵوەشاندنەوەی حیزبوڵڵایە و گوتی: "ئەمە سبەی بەدی نایەت و پێویستی بە هەوڵێکی بەردەوام، پشوودرێژی و بەڕێوەبردنێکی ژیرانەی دیپلۆماسییە."