دوو کەس لەسەر سنووری ئیسرائیل و ئوردن کوژران
رووداو دیجیتاڵ
لەسەر سنووری نێوان ئوردن و ئیسرائیل لە دیوی ئیسرائیل، دوو کەس کوژران. سوپای وڵاتەکە دەڵێت، هێرشکارەکە لە ئوردنەوە چووەتە نێو وڵاتەکە.
رووداوەکە لەسەر سنووی شا حوسێن روویداوە.
سوپای ئیسرائیل رایگەیاند، "تیرۆریستێک بە بارهەڵگرێکەوە کە یارمەتیی مرۆیی لە دیوی ئوردنەوە هێنابوو تەقەی کرد و دوو کەسی کوشت."
سوپای وڵاتەکە دەڵێت، هێرشکارەکە ویستوویەتی یارمەتیی مرۆیی بۆ کەرتی غەززە ببات. سوپای ئیسرائیل تەقەی لە هێرشکارەکە کردووە و کوشتوویانە.
گوتەبێژی حکومەتی ئوردن دەڵێت، چاودێریی رووداوەکەی دەروازەی شا حوسێن دەکەن و لێکۆڵینەوە لە رووداوەکە دەستیپێکردووە.
ئاسایشی ئوردن دەڵێت، دوای رووداوەکە، سوپای ئیسرائیل لەلای خۆیان، دەروازەکەیان داخستووە، بەڵام لە دیوی ئوردن بە کراوەیی ماوەتەوە.
دەروازەی شا حوسێن، تاکە دەروازەی نێودەوڵەتییە بۆ فەلەستینییەکانی کەرتی رۆژئاوا کە پێویست ناکات بچنە نێو ئیسرائیل.
لە رووداوێکی هاوشێوە و لە ئەیلوولی 2024، شۆفێری بارهەڵگرێکی ئوردنی لە هەمان دەروازە سێ سەربازیی ئیسرائیلی کوشت.