سەرۆکی حکومەتی هەرێمی کوردستان لەگەڵ سەرۆکی ئیمارات کۆبووەوە

 

حکومەتی هەرێمی کوردستان رایگەیاند "لە کۆبوونەوەکەدا، دوایین گۆڕانکاری و پێشهاتەکانی عێراق و ناوچەکە تاوتوێ کرا و جەخت لە پتەوکردنی زیاتری پەیوەندیی دۆستانەی نێوان هەرێمی کوردستان و ئیمارات و پەرەپێدانی هاوکاری و هاوئاهەنگی دوولایەنە لە بوارە جۆراوجۆرەکاندا کرایەوە."

 

ئەو کۆبوونەوەیە لەکاتێکدایە؛ ئەو وڵاتە دەوڵەمەندەی کەنداو، لە دوای تورکیا و ئێرانەوە، سێیەم گەورەترین هاوبەشی بازرگانیی هەرێمی کوردستانە.

 

ئاڵۆگۆڕی ئابووریی نێوان هەولێر و ئەبوزەبی، لە ساڵی 2007، بە وەبەرهێنانی ئیمارات لە کەرتی وزەی هەرێمی کوردستاندا دەستیپێکرد، کە میرنشینە عەرەبییەکە یەکەمین وڵات بوو لەسەر ئاستی جیهان دەست بە کارکردن لە کێڵگە گازی و نەوتییەکانی هەرێمی کوردستاندا بکات. 

 

ئێستاش کۆمپانیای دانە گازی ئیماراتی، رۆڵی سەرەکیی لە بەرهەمهێنانی گاز لە کۆرمۆری گەورەترین کێڵگەی گازی هەرێمی کوردستان لە چەمچەماڵی پارێزگەی سلێمانیدا دەگێڕێت. 

 

پەیوەندییەکانی هەرێمی کوردستان و ئیمارات بۆ ئەو دیوی کەرتی وزەش گەشەیان سەندووە و ئێستا هەولێر و ئەبوزەبی لە کەرتەکانی کشتوکاڵ، گەشتیاری، پیشەسازی و بازرگانیشدا پێکەوە کاردەکەن.