زیاتر لە 230 بیانی لە شەڕی نێوان ئیسرائیل و حەماس کوژراون

 

ئیسرائیل رایگەیاندووە، لە دەستپێکی شەڕەکە لە 7ـی تشرینی یەکەم، تاوەکو ئێستا 1400 ئیسرائیلی کوژراون، هەروەها 224 هاووڵاتیش لەلای حەماس بارمتەن و زیاتر لە 230 بیانیش کوژراون.

 

حەماس رایگەیاندووە، 50 لەو بارمتانە بەهۆی هێرشەکانی ئیسرائیلەوە بۆ سەر کەرتی غەززە کوژراون، بەڵام تائێستا دەسەڵاتدارانی ئیسرائیل و هیچ سەرچاوەیەکی سەربەخۆ ئەو ژمارەیان پشتڕاست نەکردووەتەوە.

 

لە دوای هێرشەکەی حەماسەوە، ئیسرائیل دەستی بە بۆردوومانێکی چڕی کەرتی غەززە کردووە، بەپێی ئاماری وەزارەتی تەندروستیی فەلەستین بەهۆی ئەو بۆردوومانانەوە زیاتر لە حەوت هەزار کەس گیانیان لەدەستداوە، کە سێ هەزاریان منداڵن.

 

 

 

بەپێی گوتەی بەرپرسانی کۆشکی سپی، تائێستا 31 ئەمریکی کورژاون، 13 کەسیش بێسەروشوێنن، کە گومان دەکرێت لە دەست چەکدارانی حەماسدا بن.

 

رۆژی 20-10-2023 بزووتنەوەی حەماس دوو بارمتەی ئەمریکی رزگارکرد، کە دایكێک و کچێک بوون.

 

 

رۆژی پێنجشەممە، بەرپرسانی تایلاند رایانگەیاند، بەهۆی شەڕی نێوان چەکدارانی حەماس و ئیسرائیل 33 تایلەندی کوژراون و 18ـی دیکەش لەلایەن حەماسەوە بە بارمتە گیراون. 

 

نزیکەی 30 هەزار تایلەندی لە ئیسرائیلن، کە زۆربەیان لە کەرتی کشتوکاڵی ئەو وڵاتە کار دەکەن.

 

 

حکومەتی فەرەنسا رایگەیاندووە، بەهۆی شەڕەکەوە 35 فەرەنسی کوژراون، هەروەها نۆ فەرەنسیش بێسەروشوێنن، یان لەلایەن حەماسەوە بە بارمتە گیراون.

 

میا شیم، کە هاووڵاتییەکی بە رەگەز فەرەنسی – ئیسرائیلییە، رۆژی 16ـی ئەم مانگە لە گرتەیەکی ڤیدیۆیی دەرکەوت، کە لەلایەن حەماسەوە بڵاوکرایەوە.

 

 

بەپێی دوایین راگەیێندراوی باڵیۆزخانەی رووسیا لە تەلئەڤیڤ، تائێستا 19 هاووڵاتی رووسیا کوژراون، دوو رووسیایی لەلایەن حەماسەوە بە بارمتە گیراون و حەوتیشیان بێسەرشوێنن.

 

 

بەرپرسانی کیێڤ رایانگەیاندووە، لە ئەنجامی شەڕەکەی نێوان چەکدارانی فەلەستین و ئیسرائیل 21 ئۆکراینی کوژراون، هەروەها ئاماژە بە بێسەروشوێن بوونی ئۆکراینییەک دەکەن.

 

 

باڵیۆزخانەی نییپاڵیش لە تەلئەڤیڤ رایگەیاندووە لە شەڕەکەی حەماس و ئیسرائیلدا 10 نیپاڵی کوژراون و پەیوەندیشیان لەگەڵ هاووڵاتییەکیان پچڕاوە.

 

265 قوتابی نیپاڵی لە ئیسرائیل دەخوێنن، 17یان لە کۆمەڵگەی جوونشینی ئالومیمن، کە لەلایەن حەماسەوە هێرشی کرایە سەر. 

 

 

دەسەڵاتدارانی ئەرجەنتین تائێستا کوژرانی نۆ هاووڵاتییان راگەیاندووە، هەروەها 21 ئەرجەنتینیش بیسەرشوێنن، کە دووانیان بران بە ناوەکانی ئیار و ئیتان.

 

 

لانیکەم 12 بەریتانی کوژراون و پێنج بەریتانیش تاوەکو ئێستا هیچ سۆراخێکیان نییە.

 

لە نێو بەریتانیا کوژراوەکاندا دایكێک و کچە 13 ساڵانەکەی بە ناوی یائیر شرابی و کوڕە 13 ساڵانەکەشی بەناوی نویا هەن، سەرۆکی خێزانەکەش بە ناوی ئیلی تائێستا بێسەروشوێنە. 

 

 

حکومەتی کەنەدا رایگەیاندووە، جگە لە گیانلەدەستدانی حەوت کەنەدی لە شەڕی نێوان حەماس و ئیسرائیلدا، تائێستا دوو هاووڵاتی کەنەدی بێسەروشوێنن.

 

 

بەرپرسانی لشبۆنە کوژرانی چوار پورتوگاڵیان راگەیاندووە و باس لە ونبوونی چواری دیکەش دەکەن.

 

 

حکومەتی چین بە فەرمی راگەیاندووە، چوار هاووڵاتی چینی کوژراون و دووانیشیان بێسەروشوێنن.

 

 

حکومەتی فیلیپین رایگەیاندووە، چوار فلیپینی کوژراون، لەوانە ئافرەتێکی تەمەن 33 ساڵ و پیاوێکی تەمەن 44 ساڵ لە هێرشی حەماس بۆ سەر ئۆردووگایەکی جوونشین، هەروەها ئافرەتێکی تەمەن 49 ساڵ کە بەشداری لە فێستیڤاڵی مۆسیقادا کردووە. 

 

حکومەتی فیلپین راشیگەیاندووە، دوو فلیپینی تائێستا بێسەروشوێنن.

 

 

حکومەتی رۆمانیا کوژرانی پێنج هاووڵاتی وڵاتەکەی پشتڕاستکردووەتەوە، لەوانەش سەربازێکی سوپای ئیسرائیل، کە وڵاتینامەی رۆمانیای هەیە. هەروەها ئاشکرای کردووە کە رۆمانییەک لەلایەن حەماسەوە رفێندراوە. 

 

بەرپرسانی نەمسا باس لە کوژرانی چوار نەمسایی و بێسەروشوێنبوونی یەکێکیان دەکەن.

 

 

رۆژی پێنجشەممە 26-10-2023 باڵیۆزخانەی بێلارووس لە تەلئەڤیڤ رایگەیاند، لە شەڕی نێوان گرووپە چەکدارەکانی فەلەستین و ئیسرائیل سێ هاووڵاتی بێلارووسی کوژراون و یەکێکیشیان بێسەروشوێنە.

 

 

پیاوێک و ژنێکی ئیسرائیلی - بەرازیلی و ئافرەتێکی بەرازیلیش لە ئەنجامی هێرشەکەی بزووتنەوەی حەماس بۆ سەر کەرتی غەززە کوژراون.  هەروەها میشال نیسنباوم، تەمەن 59 ساڵ، کە بە ئیسرائیلییەکی بە رەچەڵەک بەرازیلییە، لەنێو بێسەروشوێنبووان دایە.

 

وەزارەتی دەرەوەی پیرۆ ئاشکرای کردووە، کە سێ هاووڵاتی پیرۆ لە شەڕەکەدا گیانیان لە دەستداوە

 

 

بەرپرسانی حکومەتی ئۆروگوای رایانگەیاندووە، شانی گۆرین، تەمەن 29 ساڵ کە ئیسرائیلییەکی بە رەچەڵەک ئۆروگواییە، لە کاتی هێرشکردنە سەر کۆمەڵگەی جوونشینی نیر ئوز، رفێندراوە.

 

 

حکومەتی ئەفریقیای باشوور رایگەیاندووە، دوو هاووڵاتیی لە ئەنجامی شەڕی نێوان حەماس و ئیسرائیل لە دەستداوە.

 

 

وەزارەتی دەرەوەی ئیتاڵیا راگەیاندووە، سێ هاووڵاتی ئیتاڵی، کە دووانیان لە شەستەکانی تەمەنیانن و ئەوی دیکەشیان تەمەنی 29 ساڵە، لە کاتی هێرشەکەی حەماس بۆ سەر فێستیڤاڵێکی میوزیک کوژراون.

 

بەرپرسانی چیلی رایانگەیاندووە هاووڵاتییەکی چیلی کوژراوە و یەکێکیشیان کە لە ئۆردووگای جوونشییی کیسوفیم بووە، بێسەروشوێنە.

 

بەرپرسانی ئەنقەرە رایانگەیاندووە ئیسرائیلییەکی بە رەچەڵەک تورک، کە لە ساڵی 1972ەوە لەگەڵ خێزانەکەی لە ئیسرائیل دەژی، کوژراوە، یەکێکیش بێسەروشوێنە.

 

 

بەرپرسانی مەدرید کوژرانی ئیسپانییەکیان راگەیاندووە، کە وڵاتینامەی ئیسرائیلیشی هەیە، هەروەها باس لە دەستگیرکردنی ئیسپانییەکی دانیشتووی هەرێمی باسک دەکەن، کە هاوژینە چیلییەکەشی بە بارمتە گیراوە.

 

 

حکومەتی کۆڵۆمبیا کوژرانی هاووڵاتییەک و بێسەروشوێنبوونی یەکێکی دیکەی راگەیاندووە.

 

بەپێی بەرپرسانی کەمبۆدیا، قوتابییەکی کەمبۆدی لە ئیسرائیل، کوژراوە

 

 

حکومەتی ئوسترالیا، کوژرانی ژنێکی ئوسترالی پشتڕاستکردووەتەوە.

 

 

بەرپرسانی هیندۆراس رایانگەیاندووە، یەکێک لە هاووڵاتییەکانیان لە ئیسرائیل کوژراوە.

 

 

بەرپرسانی باکو دەڵێن، هاووڵاتییەکی ئازەربایجانی کوژراوە. 

 

بەرپرسانی سویسرا رایانگەیاندووە، هاووڵاتییەکی سویسریی تەمەن 70 ساڵ، کە لە 2004ـەوە لە ئیسرائیل نیشتەجێیە، کوژراوە.

 

 

بەرپرسانی دبلن رایانگەیاندووە، کچێکی تەمەن 22 ساڵی ئیسرائیلی بە رەچەڵەک ئێرلەندی، کوژراوە.

 

 

بەرپرسانی مەکیسکۆ ئاشکرایان کردووە، پیاوێکی مەکسیکی - فەرەنسی، تەمەن 32 ساڵ و ئافرەتێکی مەکیسکی - ئیسرائیلی، تەمەن 30 ساڵ، بە بارمتە گیراون.

 

 

بەرپرسانی هۆڵەندا رایانگەیاندووە، گەنجێکی تەمەن 18 ساڵانی هۆڵەندی لەلایەن حەماسەوە بە بارمتە گیراوە.

 

 

- ژمارەی کوژراوانی ئەڵمانی نزیکەی 10 کەسن، لەگەڵ ژمارەیەکی کەمی بارمتە.

 

 

ئۆروگوای باس لە دیارنەمانی دوو هاووڵاتی، تەنزانیا دوو هاووڵاتی و سریلانکا دوو هاووڵاتی دەکات