لە هێرشێکی ئێراندا بۆ سەر بنکەیەکی سعودیە 12 سەربازی ئەمریکی بریندار بوون

 

 

هاوکات سوپای ئیسرائیل بەرەبەیانی رۆژی شەممە رایگەیاند، مووشەکێکیان دۆزیوەتەوە کە لە یەمەنەوە ئاراستە کراوە، دواتریش دەوربەری کاژێر 10:00 حووسییەکان رایانگەیاند کە چوونەتە نێو جەنگەکەوە و هێرشیان کردوەتە سەر ئیسرائیل. 

 

فەرماندەیی ناوەندیی ئەمریکا (سێنتکۆم) رۆژی هەینی بڵاویکردەوە، دوای تێپەڕبوونی چوار هەفتە بەسەر جەنگی ئێران، ژمارەی بریندارەکانی سوپای ئەمریکا 300 کەسی تێپەڕاندووە. لە بەرامبەر ئەم پەرەسەندنانەدا، پێنتاگۆن تاوتوێی ناردنی 10 هەزار سەربازی دیکەی زەوینی بۆ رۆژهەڵاتی نێوەڕاست دەکات.

 

 

مارکۆ رووبیۆ، وەزیری دەرەوەی ئەمریکا رایگەیاند، گەورەترین ئاڵنگاری دوای کۆتاییهاتنی جەنگ بریتییە لە رێگریکردن لە ئێران بۆ وەرگرتنی "باجی تێپەڕین" لەو کەشتییانەی لە تەنگەی هورمز تێپەڕ دەبن.

 

 رووبیۆ لە فەرەنسا ئەم هەنگاوەی ئێرانی بە نایاسایی و "مەترسیدار بۆ جیهان" ناوبرد و پێشبینیشی کرد کە جەنگەکە دوو تاوەکو چوار هەفتەی دیکە بەردەوام بێت.

 

 

سەرەڕای بڕیارەکەی دۆناڵد ترەمپ بۆ راگرتنی کاتیی هێرشەکان بۆ سەر کەرتی وزەی ئێران بە مەبەستی دانوستاندن، نرخی نەوتی خاو بەرزبووەوە بۆ سەروو 100 دۆلار بۆ هەر بەرمیلێک و بازاڕەکانی پشکی ئەمریکاش دابەزین.

 

لە پەرەسەندنێکی دیکەی جەنگەکەدا، گرووپێکی هاوپەیمانی ئێران رایگەیاند کە توانیویانە هەژماری ئیمەیڵی تایبەتی کاش پاتێڵ، بەڕێوەبەری FBI هاک بکەن.