پڕۆژەیاسای ناڕەزایی دەربڕین دەخرێتە پلانی کاری پەرلەمانی ئێران

 

محەممەدساڵح جۆکار، سەرۆکی لیژنەی کاروباری نێوخۆ و ئەنجوومەنەکان لە پەرلەمانی ئێران رایگەیاند، "بەو رووداوانەی لە رۆژانی رابردوودا روویانداوە، زیاتر هەست بە پێویستیی دەنگدان لەسەر پڕۆژەیاسای تایبەت بە بەڕێوەبردنی گردبوونەوە و رێپێوان دەکەن و پڕۆژەیاساکە لە کۆبوونەوەی گشتیی پەرلەمان دەخرێتە دەنگدانەوە."

 

جۆکار دەڵێت، "لە پڕۆژەیاساکەدا رۆڵی قایمقام و پارێزگارەکان بە روونی دیاریکراوە بۆ ئەوەی شوێنی تایبەت بە بەڕێوەچوونی ناڕەزایی بۆ خەڵکی ناڕازی دیاری بکەن." هەروەها دەڵێت، رێگە بە چین و توێژە جیاوازەکان دەدرێت، لەو شوێنانەی بۆیان دیاری دەکرێت، ناڕەزایی دەرببڕن.

 

کابینەی ئیبراهیم رەئیسی لە 01-05-2023 پڕۆژەیاسای 'چۆنییەتی بەڕێوەبردنی گردبوونەوە و رێپێوانەکان'ـی دایە پەرلەمان، بەڵام تاوەکو ئێستا نەخراوەتە پلانی کاری پەرلەمان و بڕیاری لەبارەوە نەدراوە.

 

پڕۆژەیاساکە 46 مادە لەخۆ دەگرێت و تێیدا هاتووە، بە پێی مادەی 27ـی دەستووری ئێران، گردبوونەوە و کۆبوونەوە رێگەپێدراوە ئەگەر چەکدارانە و دژ بە بنەماکانی ئایینی ئیسلام نەبێت. لە پڕۆژەیاساکەدا، رێوشوێنەکان بۆ وەرگرتنی مۆڵەتی بەڕێوەبردنی گردبوونەوە و رێپێوان دیاریکراون، بەڵام ئاماژە بە خۆپێشاندان نەکراوە.

 

بەپێی دەستووری ئێران، پڕۆژەیاساکان ئەگەر لە پەرلەمان پەسند کران دەبێ لەلایەن ئەنجوومەنی پاراستنی دەستوورەوە پەسند بکرێن بۆ ئەوەی ببن بە یاسا.