تمەن نیوەی بەهای خۆی لەدەستدا؛ لە ئێران هۆشداریی "ناڕەزایەتیی بەرفراوان" دەدرێت

 

دابەزینی بەهای دراوی نیشتمانی و بەرزبوونەوەی نرخی خۆراک، بووەتە هۆی سەرهەڵدانی ناڕەزایەتی لە بازاڕەکانی تاران و چەند شارێکی دیکە.

 

بەپێی ئامارە فەرمییەکان، رێژەی هەڵاوسان لە ئێران گەیشتووەتە 43%، بەڵام شارەزایانی ئابووری دەڵێن رێژەکە 50%ـیشی تێپەڕاندووە. لەم نێوەندەدا نرخی خۆراک زیاتر لە هەر کاڵایەکی دیکە بەرزبووەتەوە؛ بەجۆرێک لە ماوەی یەک ساڵدا نرخی شیرەمەنی و هێلکە بەڕیژەی 72% زیادیکردووە.

 

سەعید لەیلاز، ئابووریناسی ئێرانی هۆشداری لە دۆخەکە دەدات و بە رووداوی گوت: "رەوشی ئەمنی دەکرێت زیاتر تێکبچێت ئەگەر ئەوانەی کە لەڕووی کۆمەڵایەتی و ئابوورییەوە لاواز و کەمدەراتن، بە ژمارەیەکی زیاتر بڕژێنە سەر شەقام. سەرەتا دووکاندار و کاسبکاران خۆپێشاندەری سەرەکی بوون و ناڕازی بوون لە دابەزینی بەهای تمەن."

 

ئەو ئابووریناسە پێیوایە ئەگەر دۆخەکە بەم شێوەیە بەردەوام بێت، مەترسیی روودانی ناڕەزایەتیی گەورە هەیە. سەعید لەیلاز دەڵێت: "هەرچەندە ئەستەمە هەڵاوسان بەرزبێتەوە بۆ ئاستی ساڵی 2022، بەڵام ئەگەر ئەم ساڵ دووبارە بەرزبێتەوە بۆ ئەو ئاستە، بە دڵنیاییەوە ناڕەزایەتیی سیاسی و کۆمەڵایەتیی بەرفراوان سەرهەڵدەدات."

 

سندووقی نێودەوڵەتیی دراو (IMF) پێشبینیکردووە لە ساڵانی 2026 و 2027ـدا بەهۆی دابەزینی بەردەوامی بەهای تمەنەوە، رێژەی هەڵاوسان لە ئێران بۆ زیاتر لە 50% بەرزبێتەوە.