خوێندنی باڵای ئێران: دەوامی زانکۆکان تاوەکو کۆتایی ئەم ساڵ بە ئۆنلاین دەبێت
رووداو دیجیتاڵ
وەزارەتی خوێندنی باڵای کۆماری ئیسلامیی ئێران رایدەگەیێنێت، دەوام و وانەی سەرجەم زانکۆ و ناوەندەکانی خوێندنی باڵا تاوەکو کۆتایی ئەم ساڵی هەتاوی بەشێوەی ئۆنلاین بەڕێوەدەچن.
بەپێی راگەیێندراوێکی وەزارەتی خوێندنی باڵای ئێران، پێویستە زانکۆ و پەیمانگەکان رێکاری پێویست و قەرەبووکەرەوە بگرنەبەر بۆ ئەو قوتابی و خوێندکارانەی کە توانای پەیوەستبوون و بەشداریکردنیان لە وانە ئۆنلاینەکاندا نییە.
لە بەشێکی دیکەی راگەیێندراوەکەدا هاتووە، لە ئەگەری بوونی دۆخێکی تایبەت لە ناوەندەکانی خوێندندا، دەتوانرێت بەپێی هەلومەرج و تایبەتمەندیی ناوچەکە بڕیاری گونجاو بدرێت؛ ئەوەش لەسەر بنەمای بۆچوونی لیژنەی بەڕێوەبردنی پارێزگاکان بۆ خوێندنی باڵا دەبێت و هیچ رێگرییەک لەو رووەوە نییە.