پێکهاتەی شاندی ئێران و ئەمریکا بۆ دانوستاندنەکانی ئیسلامئاباد ئاشکرا کرا
رووداو دیجیتاڵ
میدیاکانی ئێران پێکهاتەی شاندی وڵاتەکەیان بۆ گفتوگۆ لەگەڵ ئەمریکا بڵاوکردەوە.
ئاژانسی تەسنیمی نزیک لە سوپای پاسداران ئاشکرای کردووە، محەممەد باقر قالیباف، سەرۆکی پەرلەمانی ئێران، سەرۆکایەتیی شاندی تاران دەکات و هەریەکە لە محەممەد باقر زولقەدر، سکرتێری ئەنجوومەنی باڵای ئاسایشی نیشتمانی و عەباس عێراقچی، وەزیری دەرەوەی ئێران یاوەری دەبن.
ئەو میدیایە دەشڵێت، لە بەرامبەردا، شاندە ئەمریکییەکە بە سەرۆکایەتیی جەی دی ڤانس، جێگری سەرۆکی ئەمریکا دەبێت و ستیڤ ویتکۆف، نێردەی تایبەتی کۆشکی سپی، جارید کۆشنەر و براد کووپەر، فەرماندەی هێزە دەریاییەکانی سێنتکۆم لەنێو شاندەکەدان.
بڕیارە شەهباز شەریف، سەرۆکوەزیرانی پاکستان، وەک وڵاتی خانەخوێ سەرپەرشتیی کۆبوونەوەکان بکات کە ئامانج لێی گۆڕینی ئاگربەستە بۆ رێککەوتنێکی گشتگیر.