لە چوار مانگدا کەرتی کشتوکاڵ لە عێراق کەمترین وەبەرهێنانی تێدا کراوە

 

 

بەگوێرەی ئاماری وەزارەتی دارایی بۆ خەرجیی چوار مانگی سەرەتای ئەم ساڵ، خەرجیی وەبەرهێنان لەسەر ئاستی وەزارەتەکان دوو تریلیۆن و 338 ملیار و 181 ملیۆن و 774 هەزار دینار بووە. زۆرترینی بۆ کەرتی باڵەخانە و خزمەتگوزارییەکان بووە کە تریلیۆنێک و 104 ملیار و 278 ملیۆن و 896 هەزار دینار بووە، ئەمەش دەکاتە 47.8%.

 

سۆران عومەر، ئەندامی لیژنەی ئابووری و وەبەرهێنان و بازرگانی لە پەرلەمانی عێراق، بە رووداوی راگەیاند، زۆرترین خەرجیی وەبەرهێنان کە بۆ کەرتی خزمەتگوزاری و باڵەخانە بووە، زیاتر شەقامەکانی پێ نۆژەن کراوەتەوە یان دروستکراون، بەوپێیەی حکومەتی عێراق ئێستا گرنگیی زیاتر بەو پرسە دەدات.

 

کەمترین پارە بۆ کەرتی کشتوکاڵ خەرج کراوە کە 55 ملیار و 638 ملیۆن و 558 هەزار دینار بووە، ئەمەش دەکاتە 2.3%ی تێکڕای خەرجیی وەبەرهێنان لەو چوار مانگەدا.

 

کەرتی پیشەسازی بە پلەی دووەم هاتووە لە زۆریی خەرجی، کە 534 ملیار و 540 ملیۆن و 534 هەزار دیناری بۆ خەرج کراوە.

 

کەرتی گواستنەوە و پەیوەندییەکانیش لە ریزبەندیی سێیەمە و 473 ملیار و 432 ملیۆن و 950 هەزار دیناری بۆ خەرج کراوە.

 

بەراورد بە چوار مانگی یەکەمی ساڵی 2023، خەرجیی وەبەرهێنان لەسەر ئاستی وەزارەتەکان زیاتر لە یەک تریلیۆن دینار کەمی کردووە.