پارێزگار و سەرۆکی ئەنجوومەنی پارێزگای نەینەوا هەڵبژێردران
رووداو دیجیتاڵ
لە یەکەم دانیشتنی ئەنجوومەنی نوێی پارێزگای نەینەوا، عەبدولقادر دەخیل بە زۆرینەی دەنگ بە پارێزگاری نەینەوا هەڵبژێردرا. بەڵام هەڵبژاردنی جێگرانی پارێزگار دواخرا.
هاوکات، د. ئەحمەد حاسوود بە سەرۆکی ئەنجوومەن و محەممەد جبووری بە جێگری سەرۆکی ئەنجوومەنی پارێزگای نەینەوا هەڵبژێردران.
پارێزگاری نەینەوا لەدوای هەڵبژادنی رایگەیاند، "چەندین پڕۆژەی گرنگمان بۆ نەینەوا پێیە و لە ماوەیەکی نزیکدا گۆڕانکاریی گەورە دەبینن. دەمانەوێت لەگەڵ هەمووان کاربکەن بۆ ئەوەی نەینەوا بگەڕێتەوە دۆخی جارانی."
عەبدولقادر دەخیل گوتیشی کە ئەمڕۆ هەردوو جێگری پارێزگار هەڵدەبژێردرێن، چ بە نهێنی بێت یانیش ئاشکرا بێت.
پەیامنێری رووداو لە نەینەوا رایگەیاند، کۆبوونەوەی ئەنجوومەنی پارێزگای نەینەوا راگیراوە بۆ ئەوەی پۆستی جێگری یەکەمی پارێزگار بە نهێنی هەڵبژێردرێت.
پەیامنێری رووداو گوتیشی کە پۆستی جێگری یەکەمی پارێزگار بۆ پارتی یەکلایی بووەتەوە و جێگری دووەمی پارێزگار بۆ سوننە دەبێت.
پەیامنێری رووداو دەڵێت، دانیشتنی ئەنجوومەنی پارێزگای نەینەوا بۆ رۆژی پێنجشەمەی داهاتوو دواخرا، جێگرانی پارێزگار هەڵنەبژێردران.