کۆمیسیۆنی هەڵبژاردنی عێراق: داوای بودجە بۆ هەڵبژاردنی پەرلەمانی کوردستان دەکرێت

 

 

رۆژی یەکشەممە، 8-10-2023، جومانە غەلای، گوتەبێژی کۆمیسیۆنی باڵای سەربەخۆی هەڵبژاردنەکانی عێراق، بە تۆڕی میدیایی رووداوی راگەیاند: "سەرجەم رێکارەکانی تایبەت بە هەڵبژاردنی خولی شەشەمی پەرلەمانی کوردستانمان خستووەتە بەردەستی محەممەد شیاع سوودانی، سەرۆکوەزیرانی عێراق، پلان و وادەکان و رێوشوێنەکانمان بۆ روونکردووەتەوە، هەروەها پێداویستییە داراییەکانیشمان بۆ دیاریکردووە."

 

گوتیشی، "سەرۆکوەزیرانی عێراق داوای لە وەزارەتی دارایی کردووە سەرجەم ئەو پارانەی وەکو بودجەی هەڵبژاردنی خولی شەشەم پێویستە تەرخانبکرێت و کارئاسانی بکرێت بۆ خەرجکردنی پاداشتی کارمەندانی سەر سندووق لەو هەڵبژاردنە، هەروەها داوای لە وەزارەت و دامەزراوەکان کردووە کارئاسانی تەواو بکەن بۆ هەردوو هەڵبژاردنی پەرلەمانی کوردستان و ئەنجوومەنی پارێزگاکانی عێراقیش."

 

سەبارەت بە ژمارەی دەنگدەرانی هەرێمی کوردستان ئەوانەی کە دەتوانن لە هەڵبژاردنی 25ـی شوباتی پەرلەمانی کوردستان دەنگبدەن، گوتەبێژی کۆمیسیۆنی باڵای سەربەخۆی هەڵبژاردنەکانی عێراق روونیکردەوە: "ژمارەی ئەو کەسانەی دەتوانن بۆ هەڵبژاردنی خولی شەشەمی پەرلەمانی کوردستان دەنگبدەن، 3 ملیۆن و 641 هەزار و 566 کەسن، لەو ژمارەیە 2 ملیۆن و 742 هەزار و 216 کەسیان تۆماری خۆیان نوێکردووەتەوە و تۆمارکراون."

 

رۆژی 9ـی تشرینی یەکەمی 2023 تەمەنی پەرلەمانی کوردستان بە دەنگی 80 پەرلەمانتار بۆ کۆتایی 2023 درێژکرایەوە؛ چونکە بەهۆی هەموارکردنەوەی یاسای هەڵبژاردنەکانی هەرێمی کوردستان و ناکۆکی لایەنەکان لەبارەی بەڕێوەچوونی هەڵبژاردنەکان بە فرە بازنەیی، نەتواندرا رۆژی 1ـی تشرینی یەکەمی 2022 هەڵبژاردنی خوولی شەشەمی پەرلەمانی کوردستان بەڕێوەبچێت.

 

دڵشاد شەهاب، گوتەبێژی سەرۆکایەتیی هەرێمی کوردستان رۆژی  03-08-2023، لە کۆنفرانسێکی رۆژنامەڤانیدا رایگەیاند، نێچیرڤان بارزانی، سەرۆکی هەرێمی کوردستان رۆژی 25-02-2024ی وەکو رۆژی بەڕێوەچوونی هەڵبژاردنی پەرلەمانی کوردستان دیاریکرد، ئەوەش دوای راوێژ و گفتوگۆ لەگەڵ سەرجەم لایەنە سیاسییەکانی هەرێمی کوردستان.