لایەنگرانی سەدر بۆ پشتگیریکردنی حەماس خۆپێشاندان دەکەن

 
رووداو دیجیتاڵ 

سەدان هاووڵاتی لە مەیدانی تەحریری بەغدا بۆ پاڵپشتیکردنی حەماس و فەلەستینییەکان دەستیان بە خۆپێشاندان کرد.
 
ئەو هاووڵاتییانە دوای پەیامەکەی موقتەدا سەدر، رێبەری رەوتی سەدر هاتنە مەیدانی تەحریر کە داوای خۆپێشاندانی ملیۆنی کردووە بۆ پشتگیریکردنی فەلەستینییەکان.
 
یەکێک لە خۆپێشاندەران بە هەڵکەوت عەزیز، پەیامنێری رووداو لە بەغدای گوت: "ئێمە دەمانەوێ هاوکارییان بکەین و هەرچییەکیان پێویستبێت لە خزمەتیاندا دەبین، ئەبوو هاشم (موقتەدا سەدر) داوای کرد و ئێمە هاتینە ئێرە".
 
9ـی تشرینى دووەمى 2023، موقتەدا سەدر، رێبەرى رەوتى سەدر لە پەیامێکیدا لە تۆڕى کۆمەڵایەتیی ئێکس بانگەوازێکى بڵاوکردەوە بۆ خۆپێشاندانەکە لە دواى نوێژى هەینیی 13ـی تشرینى یەکەم لە  گۆڕەپانى تەحریر لە بەغدا.
 
موقتەدا سەدر داوا دەکات لەو خۆپێشاندانەدا ئاڵاى ئیسرائیل بسووتێندرێت و ئاڵاى فەلەستین لەپاڵ ئاڵاى عێراق بەرزبکرێتەوە. 
 
لە 7ـی ئەم مانگەوە شەڕ چەکدارانی بزووتنەوەی حەماس ئۆپەراسیۆنی "تۆفانی ئەقسا"ـیان دژی ئیسرائیل راگەیاند و هێرشیان کردە سەر چەند ناوچەیەکی ئیسرائیل و لەوکاتەوەش ئیسرائیل بەردەوام کەرتی غەززە بۆردوومان دەکات و هیچ ئاماژەیەکیش بۆ هێور بوونەوەی دۆخەکە بەدی ناکرێت.
 
لە ساتی دەستپێکردنی هێرشەکەی حەماسەوە، لانیکەم هەزار و 300 کەس لە نێو ئیسرائیلدا کوژراون و سەرووی سێ هەزاری دیکەش برینداربوون، ئەمە وەک بەرپرسانی ئیسرائیلی رایانگەیاندووە. 
 
 لە هێرشە ئاسمانییە بەردەوامەکانی ئیسرائیلیش بۆسەر کەرتی غەززە، هەزار و 417 کەس کوژراون کە 447یان منداڵ و 248یان ژنن، هەروەها 6 هەزار و 268ی دیکەش برینداربوون، ئەمە بە گوێرەی وەزارەتی تەندروستیی غەززە.