حەشدی شەعبی درۆنێکی ئێرانی نمایش دەکات

 

 

رۆژی چوارشەممە 14-06-2023 دەستەی حەشدی شەعبی، کە دەستەیەکی سەربازیی هێزە شیعەکانی عێراقە، لە ساڵیادی دامەزرانیدا، لە گرتەیەکی ڤیدیۆییدا رایگەیاند، فڕۆکەی بێفڕۆکەوانی لە جۆری موهاجیر شەش دەستکەوتووە، جگە لە نمایشکردنی و تاقیکردنەوەی فڕۆکەکە، لە گرتە ڤیدیۆیەکەدا فڕۆکەکە لە رێگەی سیستمی کۆنترۆڵەوە لە ژووری ئۆپەراسیۆنەکان ئامانجێکی دروستکراو بۆ تەقاندنەوە بۆردووماندەکات.

 

میدیاکانی ئێران دەڵێن ئەو فڕۆکەیە هێزی بەرەنگاربوونەوەی حەشدی شەعبی زیاد دەکات و یەکێک دەبێت لەنێو چەک و کەرەستە سەربازییەکانی بەردەستی، کە بۆ پاراستنی ئاسایش و سەقامگیریی عێراق دەبێت لە گرووپە تیرۆریستییەکان و بەرەنگاربوونەوەی هێزەکانی ئەمریکا لە عێراق وەکو باسیان کردووە.

 

ئێران یەکێکە لەو وڵاتانەی جیهان کە تێکەڵ بە پیشەسازیی بەرهەمهێنانی درۆن بووە و ئێستا نزیکەی شەش جۆری هەیە، کە زنجیرەکانی شاهید و موهاجیر دیارترینیانن.

 

موهاجیر شەش یەکێکە لە فڕۆکە بێفڕۆکەوانە دروستکراوەکانی ئێران، هەڵگری بۆمبی زیرەکە و زۆر بە وردی ئامانجەکانی دەپێکێت، فڕۆکەکە توانای ناردنی زانیاریی هەیە بۆ سەنتەری کۆنتڕۆڵ و توانایەکی بەهێزی چاودێریکردنی هەیە.

 

مانگی نیسانی 2018 وەزارەتی بەرگریی ئێران دروستکردنی ئەو فڕۆکە بێفڕۆکەوانەی راگەیاند و ئاشکرایکرد، فڕۆکەکە بە حیزبوڵڵای لوبنان دەدەن، فڕۆکە بێفڕۆکەوانەکە توانای نیشتنەوە و هەستانی لە فڕگەی کورتیشدا هەیە.