هاوپەیمانیی بەڕێوەبردنی دەوڵەت کۆدەبێتەوە

 

شەوی دووشەممە، 17-7-2023، عەلی غانمی، ئەندامی مەکتەبی سیاسیی رەوتی فوراتەین، بە تۆڕی میدیایی رووداوی راگەیاند: "ئەمشەو کۆبوونەوەی هاوپەیمانیی بەڕێوەبردنی دەوڵەت بە ئامادەبوونی بەشی زۆری سەرکردەکانی هاوپەیمانێتییەکە بەڕێوەدەچێت."

 

سەبارەت بەو بابەتانەی کە بڕیارە کە کۆبوونەوەی ئەمشەوی هاوپەیمانێتییەکە باسبکرێن، ئەو بەرپرسەی رەوتی فوراتەین روونیکردەوە: "ژمارەیەک دۆسییەی گرنگ باسدەکرێن کە بابەتی رۆژن و پەیوەندیی بە وڵاتەوە هەیە لەوانە سەردانەکەی رۆژی یەکشەممەی ئەم هەفتەیەی سەرۆکوەزیرانی عێراق بۆ سووریا، پرسی واژۆکردنی رێککەوتننامەی نەوتی لەگەڵ ئێران، واژۆکردنی رێککەوتننامەی نەوتی لەگەڵ قەتەر، بابەتی یاسای بودجە و شایستەکانی هەرێمی کوردستان و پابەندبوونەکانی و جێبەجێکردنی یاساکە بەشێوەیەکی گشتی، هەروەها بابەتی یاسا گرنگەکانی وەکو نەوت و گاز و کۆمەڵێک پێشنیازی دیکەی یاسا و پڕۆژەیاسا کە هەن، ئەوانە هەموویان لەگەڵ بابەتی دیکەی رۆژ لەو پرسانەن کە ئەمشەو هاوپەیمانێتییەکە تاوتوێیان دەکات."

 

کۆبوونەوەکەی هاوپەیمانی بەڕێوەبردنی دەوڵەت دوای ئەوە دێت، رۆژی یەکشەممە، 16-7-2023، محەممەد شیاع سوودانی، سەرۆکوەزیرانی عێراق سەردانی سووریای کرد و لەگەڵ بەشار ئەسەد، سەرۆکی ئەو وڵاتە کۆبووەوە، لەماوەی چەند رۆژی رابردووش عێراق ژمارەیەک گرێبەستی گەورەی لەگەڵ چەند وڵاتێک واژۆکرد و بەشێکیان دەست بە جێبەجێکردنیان کران.

 

هاوپەیمانیی بەڕێوەبردنی دەوڵەت گەورەترین هاوپەیمانێتییە لە دوای هەڵبژاردنەکانی 10ـی ئۆکتۆبەری 2021ەوە دروستکراوە، جگە لە زۆرینەی لایەنە شیعەکان، پارتی دیموکراتی کوردستان و یەکێتیی نیشتمانیی کوردستان و هاوپەیمانیی سەرەوەریی سوننەکان و چەندین لایەنی دیکە لەخۆدەگرێت و پێکهێنەری حکومەتی نوێی عێراقە، کە محەممەد شیاع سوودانی سەرۆکایەتیی دەکات.