سەرۆككۆماری عێراق و سێ جێگرەكەی كۆدەبنەوە
رووداو ـ بەغدا
نووسینگەی سەرۆككۆماری عێراق رایگەیاند ئەمڕۆ پێنجشەممە سەرۆككۆماری عێراق لەگەڵ سێ جێگرەكانی كۆبووەوە.
نووسینگەی تایبەتی فوئاد مەعسوم سەرۆككۆماری عێراق لە بەیاننامەیەكدا كە كۆپییەكی بۆ تۆڕی میدیایی رووداو نێردراوە، رایگەیاند: " لە رۆژی هەڵبژاردنی دەستەی سەرۆكایەتی كۆمار لە 8ی ئەم مانگە ئەمڕۆ پێنج شەممە 18/9 یەكەمجارە فوئاد مەعسوم سەرۆككۆماری عێراق لەگەڵ نووری مالیكی، ئوسامە نوجێفی و ئەیاد عەلاوی جێگرانی سەرۆككۆمار كۆدەبێتەوە".
لە 9 ی ئەم مانگەش سەرۆككۆمار بەجیا لەگەڵ هەریەك لە نووری مالیكی و ئوسامە نوجێفی كۆبووەوە، هەروەها لە 11 ی ئەم مانگەش پێشوازی لە ئەیاد عەلاوی كردووە.
ئەمەش یەكەم كۆبوونەوەی فوئاد مەعسوومە لەگەڵ هەرسێ جێگرەكانی.
لە سەرەتای ئەم مانگە پەرلەمانی عێراق متمانەی بەخشیە پێكهاتەی حكومەتی حەیدەر عەبادی و هەرسێ جێگرانی سەرۆككۆماری عێراق نووری مالیكی و ئوسامە نوجێفی و ئەیاد عەللاوی.