هونەرمەند چیا شەنسەس لە ئیستەنبووڵ دەستگیر دەکرێت

 

رۆژدا شەنسەس، خوشکی هونەرمەند چیا شەنسەس کە خۆیشی هونەرمەندێکی ناسراوە لە هەژماری تایبەتی خۆی لە تۆڕی کۆمەڵایەتی تویتەر تۆمارێکی ڤیدیۆیی بڵاوکردەوە و تێیدا ئاماژەی بەوەدا، "بەبێ ئاشکراکردنی هیچ هۆکارێک، تیمەکانی پۆلیسی ئیستەنبووڵ بەرەبەیاینی زوو هەڵیانکوتاوەتە سەر ماڵی براکەی و بردوویانە." 

 

رۆژدا شەنسەس دەڵێت، لە بارەی براکەیەوە زانیارییان پێناگات و رێگە نادەن پارێزەران دیداری لەگەڵدا ئەنجامبدن. هەروەها باسی لەوەش کردووە، براکەی تەنیا سەرقاڵی کارە هونەرییەکانی خۆی بووە و هیواخوازە لە ماوەیەکی نزیکدا ئەم "نادادپەروەرییە" کۆتایی بێت و چیا شەنسەسی برای ئازاد بکرێ. 

 

چیا شەنسەس خەڵکی گوندی توتن سەر بە شارۆچکەی میسرج ـە لە پارێزگای سێرتی باکووری کوردستان و ساڵانیکی زۆرە لە شاری ئیستەنبووڵ دەژی. شەنسەس گۆرانیبێژی سەرەکی گرووپی "کۆما گولێن خەرزان" ـە کە ساڵی 1989 لە ئیستەنبووڵ دامەزراوە و لە 1992 دا بووەتە بەشێک لە ناوەندی کولتووری میزۆپۆتامیا لە ئیستەنبووڵ.  

 

ناوەندی کولتووری میزۆپۆتامیا لە چەندین شاری باکووری کوردستان و تورکیا و ئەوروپا کۆنسێرتیان سازداوە، هەروەها چەندین ئەلبووم و کلیپی بە زمانی کوردی تۆمار کردووە.