لە چەند ناوچەیەکی بەغدا لافاو هەستاوە
رووداو - بەغدا
بەهۆی بارانبارینی زۆر، لە بەشێکی گەڕەکەکانی شاری بەغدا لافاو هەستاوە، بەکاربەرانی تۆڕە کۆمەڵایەتییەکانیش هۆکاری دروستبوونی لافاو لە بەغدا بۆ خراپی ئاوەڕۆکانی ئەو شارە دەگەڕێننەوە.
رۆژی شەممە 24-12-2016، بەهۆی بارینی بارانێكی زۆر لە شاری بەغدا، لافاو لە هەندێک لە گەڕەکەکانی ئەو شارە هەستا و، هاتووچۆی دانیشتووانی لەنێوان ئەو گەڕەکانە سەخت کرد.
بەکاربەرانی تۆڕە کۆمەڵایەتییەکانی وەکو فەیسبووک و تویتەر، چەندین وێنەی ئەمڕۆی بەغدایان بڵاوکردوونەتەوە، لە وێنەکاندا دەردەکەوێت بڕێكی زۆر ئاو لە ژمارەیەك گەڕەكدا كۆبووەتەوە و لافاو هەستاوە.
خەڵكی بەغدا و بەکاربەرانی تۆڕە کۆمەڵایەتییەکان هۆکاری دروستبوونی لافاو بۆ خراپی ئاوەڕۆکانی بەغدا دەگەڕێننەوە و حکومەت بە بەرپرسیاری ئەو دۆخە دەزانن، چونكە ساڵانە دووبارە دەبێتەوە.