موقتەدا سەدر داوای داخستنی باڵیۆزخانەی ئەمریکا لە عێراق دەکات

 

 

رۆژی هەینی، 27-10-2023، موقتەدا سەدر، رێبەری رەوتی سەدر، لە نوێترین کاردانەوە و هەڵوێستی بەرامبەر شەڕی نێوان گرووپە چەکدارەکانی غەززە و ئیسرائیل، راگەیێندراوێکی لە هەژماری خۆی لە تۆڕی ئێکس بڵاوکردەوە تێیدا هاتووە: "بۆ یەکەمجارە داوا لە حکومەت و پەرلەمانی عێراق بە هەموو چین و ئاڕاستەکانییەوە دەکەم دەنگ بە داخستنی باڵیۆزخانەی ئەمریکا لە عێراق بدەن، بەهۆی پشتیوانیی بێسنووری ئەمریکا بۆ تیرۆریستانی زایۆنی لە دژی غەززە، لەگەڵ پابەندبوون بە پاراستنی تاکە دیپلۆماتکارەکانیان و زیانپێنەگەیاندنیان لەلایەن میلیشیا خراپەکارەکانەوە، کە ئاسایش و سەلامەتیی عێراقیان ناوێت."

 

رێبەری رەوتی سەدر لەگەڵ ئەوەی لە راگەیێندراوەکەیدا دەستەواژەی "داخستنی باڵیۆزخانەی ئەمریکا"ی بە هاشتاگ داناوە و ئەمڕۆ لە عێراق دەبێتە یەکێک لە ترێندەکان، دەڵێت، "چاوەڕوانی وەڵامی حکومەت و کردار و وەڵامی لەگەڵ ئەو داواکارییە دەکەین."

 

موقتەدا سەدر، رێبەری رەوتی سەدر باسی ئەو بژاردەشی کردووە کە ئەگەر حکومەت و پەرلەمانی عێراق وەڵامی داواکارییەکەی نەداتەوە: "هەڵوێستێکی دیکەمان دەبێت دواتر رایدەگەیێنین."

 

موقتەدا سەدر لە راگەیێندراوەکەی داوای لە لایەنگرانی کردووە ملکەچی بڕیارەکان بن و هیچ کاردانەوە و هەڵوێستێکی تاکەکەسی دەرنەبڕن و بەهیچ شێوەیەک چەک بەکارنەهێنن، دەڵێت: "داوا لە خۆشەویستانی جیهاد و جەمسەری رەتکردنەوە دەکەم، کە ئەو داوایە بە پاساوی قەیرانی ئابووری بەهۆی گەنجینەی ئەمریکا رەتنەکەنەوە، چونکە بێدەنگی خوانەخواستە دەبێتە هۆی ئاساییکردنەوە و هاوڕەگەزخوازی و هەژاری."

 

رۆژی شەممە، 7ی تشرینی یەکەمی 2023 بزووتنەوەی حەماس ئۆپەراسیۆنی ناونراو بە "تۆفانی ئەقسا"ی دژی ئیسرائیل راگەیاند؛ ئیسرائیلیش لە بەرامبەردا ئۆپەراسیۆنی "شمشێری ئاسنین"ـی راگەیاند. لانیکەم تائێستا هەزار و 400 ئیسرائیلی و زیاتر لە 7 هەزار 326 فەلەستینی کوژراون و 18 هەزار و 967 کەسی دیەکش برینداربوون، بەپێی گوتەی بەرپرسانی ئیسرائیل 229 بارمتە لەلای حەماسن لە غەززە.