دوای رووخانی ئەسەد زیاتر لە 600 هەزار سووریایی چوونەتە تورکیا
رووداو دیجیتاڵ
وەزارەتی ناوخۆی تورکیا، روونکردنەوەی لەبارەی ژمارەی ئەو پەنابەرە سووریاییانە دا کە گەڕاونەتەوە وڵاتەکەیان. وەزارەتەکە رایگەیاند، لە ساڵی 2016ـەوە، ملیۆنێک و 407 هەزار و 568 سووریایی گەڕاونەتەوە وڵاتەکەیان.
وەزارەتی ناوخۆی تورکیا لە راگەیێندراوەکەیدا دەڵێ، "ئێستا لە تورکیا دوو ملیۆن و 280 هەزار و 542 سووریایی تۆمارکراو ماون. بەتایبەتی دوای گۆڕانی رژێم لە سووریا لە هەشتی کانوونی دووەمی 2024ـەوە، گەڕانەوە زیاتر بووە."
بەگوێرەی داتاکانی وەزارەتەکە، دوای رووخانی حکومەتەکەی بەشار ئەسەد، 667 هەزار و 565 کەسی دیکە لە تورکیاوە چوونەتەوە وڵاتەکەیان و دەشڵێت: "ئەو داتایانە لە رێگەی پشکنین لە دەروازە سنوورییەکان، راپۆرتی جووڵەی دانیشتووان و کۆکردنەوەی سەرچاوەی جیاوازەوە بە وردی ئامادە کراون."
بەگوێرەی کۆمیسیاریای باڵای پەنابەرانی سەر بە نەتەوە یەکگرتووەکان (UNHCR)ـیش، لەو رۆژەوەی رژێمی پێشووی سووریا رووخاوە تاوەکو ئێستا، لە سەرانسەری ناوچەکە بە گشتی ملیۆنێک و 630 هەزار و 874 سووریایی گەڕاونەتەوە وڵاتەکەیان. کە زۆربەیان لە تورکیاوە بووە و ژمارەیان 639 هەزار و 995 کەس بووە.