تەندروستیی سووریا: لە هێرشە درۆنییەکەی سەر کۆلێژی سەربازیی حمس 80 کەس گیانیان لەدەستدا

 

 

شەوی پێنجشەممە، 5-10-2023، حەسەن غەباش، وەزیری تەندروستیی سووریا لە لێدوانێکی رۆژنامەوانیدا ئاماری کوژراو و بریندارانی هێرشە درۆنییەکەی پاشنیوەڕۆی ئەمڕۆی بۆ سەر کۆلێژی سەربازیی شاری حمسی سووریا راگەیاند و ئاشکرایکرد " ژمارەی ئەو کەسانەی لە هێرشە تیرۆریستییەکەی سەر کۆلێژی سەربازی حمس گیانیان لەدەستدا تاوەکو ئێستا 80 کەسن و ئەوە ئاماری کۆتایی نییە، لەنێو ئەو کەسانەدا شەش ئافرەت و شەش منداڵ هەن، جگە لەوەی زیاتر لە 240 کەسیش برینداربوون."

 

پاشنیوەڕۆی هەمان رۆژ، فەرماندەیی گشتیی سوپا و هێزە چەکدارەکانی سووریا لە راگەیێندراوێکدا لەبارەی هێرشەکەی سەر شاری حمس رایگەیاند، "ئەو گرووپە چەکدارە تیرۆریستانەی لەلایەن لایەنی نێودەوڵەتیی ناسراوە و پشتیوانی دەکرێن، پاشنیوەڕۆی ئەمڕۆ رێوڕەسمی دەرچوونی ژمارەیەک لە ئەفسەرانی کۆلێژی سەربازییان لە شاری حمس لەرێگەی درۆنەوە کردووەتە ئامانج، ئەو درۆنانە تەقەمەنییان پێبووە و راستەوخۆ لەدوای تەواوبوون، رێوڕەسمەکەیان کردووەتە ئامانج و ئەوەش بووەتە هۆی شەهیدبوونی ژمارەیەک سڤیل و سەرباز و دەیان بریندار کە بەشێکیان برینەکانیان سەختە."

 

هێرشەکە حکومەتی سووریای ناچارکرد سێ رۆژ ماتەمینی گشتی لەو وڵاتە رابگەیێنێت کە لە رۆژی هەینی، 6ـی ئۆکتۆبەری 2023ەوە دەستپێدەکات، ماتەمە گشتییەکە سەرجەم باڵیۆزخانە و دامەزراوە دیپلۆماسییەکانی ئەو وڵاتەش دەگرێتەوە.

 

وەزارەتی دەرەوەی سووریا لەباری هێرشەکەوە راگەێیندراوێکی بلاوکردەوە تێیدا ئەو گرووپە چەکدارانەی بە ئەنجامدانی کردەوەکە تۆمەتبارکرد کە لەلایەن ئەمریکا و لایەنە نێودەوڵەتییەکانی دیکەوە پشتیوانی دەکرێن.

 

ئاماژەی بەوەشکردووە کە سووریا وەڵامی تووندی بۆ ئەو کردەوەیە دەبێت و حکومەتی ئەو وڵاتە بەردەوام دەبێت تا ئەو کاتەی هێزە بیانییەکان و گرووپە چەکدارەکانی سەر بەو وڵاتانە لەو وڵاتە ناهیڵن.

 

وەزارەتی دەرەوەی سووریا داوای لە نەتەوەیەکگرتووەکان و ئەنجوومەنی ئاسایشی نێودەوڵەتی کردووە ئەو کارە سەرکۆنە بکەن و بڕیارەکانی نەتەوەیەکگرتووەکان جێبەجێ بکەن.

 

بەپێی چەند سەرچاوەیەکی هەواڵ، گوایە ژمارەیەک بەرپرسی سەربازیی سووریا لە رێوڕەسمەکەدا بوون و باس لە برینداربوونی عەلی عەباس، وەزیری بەرگریی سووریا دەکرێت، بەڵام سەرچاوەیەکی ئەمنی رەتیکردووەتەوە و باسی لەوەکردووە دوای تەواوبوونی رێوڕەسمەکە، راستەوخۆ شوێنەکەی بەجێهێشتووە.

 

حمس یەکێکە لە گەورەترین پارێزگاکانی سووریا لەرووی رووبەرەوە، دەکەوێتە ناوەڕاستی ئەو وڵاتە و سنووری پارێزگاکە تاوەکو سنووری عێراق و لوبنان درێژدەبێتەوە، نزیکەی 180 کیلۆمەتر لە دیمەشقی پایتەختی سووریاوە دوورە، پارێزگاکە چەندین بنکەی سەربازی و کۆلێژەی سەربازی و پاڵاوتگەی نەوتی تێدایە.