ژنێکی نیشتەجێی ئەنقەرە دەڵێ، ترەمپ باوکییەتی و داوای پشکنینی دی ئێن ئەی دەکات

 

ئۆزمەن داوای پشکنینی DNA لە ترەمپ دەکات و دەڵێت: "دەمەوێ باوکم دانم پێدا بنێت."

 

نەجلا ئۆزمەن بانگەشەی ئەوە دەکات دایکی هاووڵاتییەکی ئەمریکی بووە بە ناوی سۆفیا و لە ساڵی 1970 پەیوەندی لەگەڵ دۆناڵد ترەمپ هەبووە. 

 

ئۆزمەن دەڵێ، کاتێک ساوا بووە، لەلایەن دایکییەوە دراوەتە خێزانێکی تورک و لە ئەنقەرە گەورە بووە. بە گوتەی خۆی، ئەو خێزانەی کە گەورەیان کردووە، ساڵی 2017 کاتێک ترەمپیان لە تەلەڤزیۆن بینیوە، پێیان گوتووە: "ئەوە باوکی راستەقینەی تۆیە."

 

دۆسیەکە برایە دادگەی 27ـی کاروباری خێزانیی ئەنقەرە، بەڵام دادگە بە پاساوی کەمیی بەڵگە سکاڵاکەی رەتکردەوە. ئۆزمەن تانەی لە بڕیارەکە دا و داواکەی بردوەتە دادگەی پێداچوونەوە و هەروەها لە رێگەی باڵیۆزخانەوە داواکارییەکی بۆ دادگەکانی ئەمریکاش ناردووە بۆ ئەوەی لەوێش بەدواداچوون بۆ دۆسیەکەی بکرێ.

 

نەجلا ئۆزمەن، لە لێدوانێکیدا بۆ میدیاکانی تورکیا گوتی، لێکچوونێکی زۆری جەستەیی لەنێوان خۆی و ترەمپ دەبینێت و گوتی: "لە رووی روخسار و چاوەوە زۆر لەو و کچەکەی دەچم؛ داوا دەکەم پشکنینی DNA بکرێ. پشتیوان بە خودا، دەردەچێت کە باوکمە، داواکاریم ئەوەیە رووبەڕوو لەگەڵی دانیشم. دەمەوێ وەک خێزان یەکدی بناسین. دەمەوێ ئەو و خوشک و براکانم دانم پێدا بنێن و لەنێو خێزانەکەیاندا قبووڵم بکەن."