باکرهان بۆ ئەردۆغان: وەرن با پێکەوە مێژوو بنووسینەوە

 

تونجەر باکرهان، رۆژی سێشەممە، 5ـی ئایاری 2026، لە کۆبوونەوەی فراکسیۆنی پارتەکەیدا لە پەرلەمانی تورکیا گوتارێکی پێشکێش کرد. باکرهان ئاماژەی بە نائارامییەکانی رۆژهەڵاتی ناوەڕاست کرد و گوتی: "جەنگ و هەڕەشە بەسەر گەلاندا دەسەپێندرێت. لەم دۆخەدا، دۆستی مێژوویی کورد، تورکە و دۆستی مێژوویی تورکیش، کوردە. ئەگەر تورکیا بتوانێت هاوسەنگی دابین بکات، دەتوانێت بەشدارییەکی ئەرێنی لە پێشهاتەکانی ناوچەکەدا بکات."

 

هاوسەرۆکی دەم پارتی رەخنەی لە دەسەڵات گرت و گوتی: "ئەمڕۆ هەموو مەرجەکان بۆ ئاشتی گونجاون، بەڵام کێشەی سەرەکی نەبوونی سیاسەتە. ناوی جیدییەتی ئەم پڕۆسەیە یاسایە. ئەگەر ئاشتی تۆوێک بێت، ئەوا خاکەکەی یاسایە. ئەو کەسانەی پێیان دەگوترێت وەرن، بۆ کوێ بێن؟ وەرن، بەڵام یاسا نییە."

 

باکرهان داوای لە نوعمان کورتوڵموش، سەرۆکی پەرلەمانی تورکیا کرد لە ماوەی هەفتەیەکدا چوارچێوەی یاسایی پڕۆسەکە پێشکەش بە پەرلەمان بکات و گوتی: "با یاسا تایبەتەکە دەستبەجێ پێشکەشی پەرلەمان بکەین و لە ماوەی هەفتەیەکدا ببێتە یاسا. با هەلومەرجێکی گونجاو بۆ بەڕێز ئۆجەلان دروست بکرێت تاوەکو بتوانێت بە ئاسوودەیی کار بکات."

 

 

تونجەر باکرهان لە بەردەوامیی قسەکانیدا پاڵپشتیی خۆی بۆ گوتارەکەی ئەمڕۆی دەولەت باخچەلی، سەرۆکی مەهەپە دەربڕی و گوتی: "بەڕێز ئۆجەلان خۆی دەڵێت تەنیا خەمی چارەسەرکردنی کێشەکەیەتی. پرسیارەکەی بەڕێز باخچەلی کە 'پێگەی ئۆجەلان چی دەبێت؟' پرسیارێکی مێژووییە و لە جێی خۆیدایە. ئێمە واژۆ لەسەر قسەکانی ئەمڕۆی بەڕێز باخچەلی دەکەین سەبارەت بە پڕۆسەکە."

 

ئەمە لە کاتێکدایە کە هەر ئەمڕۆ دەولەت باخچەلی پێشنیازی کرد ناوی پڕۆسەکە ببێتە "هاوئاهەنگیی پڕۆسەی ئاشتی و بەسیاسیکردن" و جەختی لە گرنگیی گفتوگۆ لەسەر پێگەی ئۆجەلان کردەوە.

 

باکرهان بانگەوازی ئاراستەی سەرۆککۆماری تورکیا کرد و گوتی: "بەڕێز ئەردۆغان، وەرن با پێکەوە مێژوو بنووسینەوە. بەڵێن دەدەین ئەو ئاشتییەی کە 100 ساڵە حەسرەتمانە، لەم خاکەدا دایبمەزرێنین. ئەم پڕۆسەیە سەختە، پەرلەمان دەستپێشخەریی کرد و رێکخراوێکی نیو سەدەیی چەکی دانا."

 

پڕۆسەی چارەسەریی پرسی کورد لە تورکیا نزیکەی ساڵێک و نیوە دەستی پێکردووە. لە 1ـی تشرینی یەکەمی 2024 دەولەت باخچەلی بانگەوازی بۆ ئۆجەلان کرد کە پەکەکە چەک دابنێت. 

لە 27ـی شوباتی 2025 ئۆجەلان لە زیندانی ئیمرالییەوە داوای لە پەکەکە کرد رێکخستنەکەی هەڵبوەشێنێتەوە. دواتر لە ئایاری 2025ـدا پەکەکە لە کۆنگرەی 12ـی خۆیدا بڕیاری کۆتاییهێنان بە خەباتی چەکداریی دا.

 

لە تەممووزی 2025ـەوە گەریلاکانی پەکەکە بە کردەیی دەستیان بە چەکدانان کرد و لە تشرینی یەکەمی هەمان ساڵدا لە ناوخۆی تورکیا کشانەوە. حکومەتی تورکیا لە 5ـی ئابی 2025ـەوە "کۆمیسیۆنی یەکڕیزیی نیشتمانی، برایەتی و دیموکراسی" لە پەرلەمان پێکهێناوە بۆ رێکخستنی چوارچێوە یاساییەکان، بەڵام بەرپرسانی دەسەڵات دەڵێن بۆ دەرکردنی یاساکان، پێویستە دامەزراوەکانی پەکەکە لە ئەورووپا و وڵاتانی دیکەش بە تەواوی هەڵبوەشێنەوە.