ژمارەی دانیشتووانی تورکیا لە 6 مانگدا 160 هەزار زیادی کردووە

 

بەگوێرەی داتاکانی دامەزراوەی ئاماری تورکیا کە ئەمڕۆ چوارشەممە 13ـی ئاب بڵاوکراوەتەوە، ژمارەی دانیشتووانی تورکیا و باکووری کوردستان گەیشتووەتە 85 ملیۆن و 824 هەزار و 854 کەس. 

 

بەپێی داتاکان بێت، لە 6 مانگی یەکەمی ئەمساڵدا ژمارەی دانیشتووانی تورکیا 159 هەزار و 910 کەس زیادی کردووە.

 

لە کۆی گشتیی دانیشتووان، رێژەی پیاوان 50.01٪ـە کە دەکاتە 42 ملیۆن و 923 هەزار و 584 کەس، رێژەی ژنانیش 49.99٪ ـە، کە دەکاتە 42 ملیۆن و 901 هەزار و 270 کەس.

 

دامەزراوەی ئاماری تورکیا لە کۆتایی ساڵی 2024 ـدا رایگەیاندبوو، ژمارەی دانیشتووانی تورکیا 85 ملیۆن و 664 هەزار و 944 کەسە.

 

بەمەبەستی زیادکردنی ژمارەی دانیشتووان، حکومەتی تورکیا ئەمساڵی وەکو "ساڵی خێزان" راگەیاندووە و پڕۆژە پێشکێش دەکات بۆ ئەوەی منداڵبوون زیاد بکات.