سەرۆکی پەرلەمانی تورکیا: لەوانەیە نەتەنیاهوو دەست بە کۆمەڵکوژی بکاتەوە

 

نوعمان کورتوڵموش، سەرۆکی پەرلەمانی تورکیا لە کۆبوونەوەی سێقۆڵیی سەرۆکی پەرلەمانەکانی ئازەربایجان، پاکستان و تورکیا کە رۆژی دووشەممە 13-10-2025 لە شاری ئیسلام ئاباد بەرێوەچوو، گوتارێکی پێشکێشکرد.

 

دوای گفتوگۆی پەرلەمانتارانی سێ وڵاتەکە، نوعمان کورتوڵموش، سەردار ئایاز سادق، سەرۆکی پەرلەمانی پاکستان و ساهیبا غافارۆڤا، سەرۆکی پەرلەمانی ئازەربایجان، "رێککەوتنی ئیسلام ئاباد"یان واژۆکرد.

 

سەرۆکی پەرلەمانی تورکیا رایگەیاند، پەرلەمانتارانی سێ وڵات لە کۆبوونەوەی "بەهێزکردنی پەیوەندییەکانی برایەتی: هاوئاهەنگیی پەرلەمانی بۆ ئاشتی، ئاسایش و خۆشگوزەرانی" گفتوگۆی باش و ئەرێنییان لەسەر بابەتەکانی وەک بەرگری و ئاسایش، گەشەپێدانی بەردەوام، گۆڕانی کەشوهەوا و مامەڵەکردن لەگەڵ کارەساتەکان سازکرد.

 

کورتوڵموش ئاگربەستی نێوان ئیسرائیل و حەماسی بە هیوابەخش ناوبرد و گوتی: "سەرەتا وەستانی خوێنڕشتن، مسۆگەرکردنی ئاگربەستێکی هەمیشەیی، گەیاندنی هەموو کۆمەکە مرۆییە پێویستەکان بەبێ هیچ ئاستەنگێک بۆ خە‌‌ڵکی غەززە و دەستپێکردنەوەی ئاوەدانکردنەوەی غەززە لەگەڵ ساڕێژبوونی برینەکانی خوشک و برا فەلەستینییەکانمان، گەورەترین ئاواتمانە".

 

سەرۆکی پەرلەمانی تورکیا گوتیشی: "نیگەرانیی ئێمە ئەوەیە، نەتەنیاهوو و حکومەتەکەی دوای واژۆکردنی ئەو رێککەوتننامەیە و ئازادکردنی بارمتەکان، بۆی هەیە دووبارە بگەڕێنەوە سەر کۆمەڵکوژی و هەنگاوە نامرۆڤانەکانیان. هەر بۆیە پێویستە ئەو گوشارە نێودەوڵەتییە بێ وچان بەردەوام بێت و ئاشتەوایی هەمیشەیی فەراهەم بکرێت".

 

کوڕتوڵمووش رایگەیاند، بڕیارەکان، بۆچوونەکان، مەبەستەکانیان بۆ بەهێزکردنی دیالۆگ و هاریکاریی نێوان پەرلەمانەکان، لە جاڕنامەی ئیسلام ئاباد کە واژۆیان کردووە، تۆمارکراون و هیوای خواست، کۆبوونەوەکە جگە لە هاوکاریی سێقۆڵی، بەشداری لە ئاشتی، سەقامگیری و خۆشگوزەرانی ناوچەکەش بکات و ببێتە مایەی خێر.

 

لە کۆبوونەوەکەدا عەبدولحەمید گوڵ، بریکاری سەرۆکی فراکسیۆنی ئاکپارتی، عەلی شاهین، سەرۆکی گرووپی دۆستایەتی پەرلەمانی تورکیا و پاکستان و پەرلەمانتاری ئاکپارتی، عەبدولقادر ئۆزەل، پەرلەمانتاری ئاکپارتی و عیرفان نەزیرئۆغڵو، باڵیۆزی تورکیا لە ئیسلام ئاباد ئامادەبوون.