لە ئەنقەرە بۆ داواکردنی خوێندن بە زمانی کوردی رێپێوان دەکرێت

 

پلاتفۆرمی دامەزراوە دیموکراتییەکان رایگەیاند، رۆژی هەینی 15ـی ئایاری 2026، کاژێر 17:00 رێپێوانێک بە دروشمی "پێگە بۆ زمانی کوردی و خوێندن بە زمانی دایک" رێکدەخەن. رێپێوانەکە لەبەردەم کۆمەڵەی زمان و کولتوور و هونەریی (ئانکا) لە ناوچەی چانکایا دەستپێدەکات و لەبەردەم باڵەخانەی وەزارەتی پەروەردەی تورکیا کۆتاییدێت.

 

جگە لە رێپێوانەکە، بڕیارە چەند چالاکییەکی کولتووری و هونەری بکرێن. لە شانۆی نێرگز لە ناوچەی کزڵئای، هەریەک لە (کۆما ئەنادۆڵ) و کۆرسی منداڵانی ئەنادۆڵ کۆنسێرتێک پێشکێش دەکەن؛ هەروەها گرووپی منداڵانی کۆمەڵەی (ئانکا) شانۆگەرییەک بە زمانی کوردی نمایش دەکەن.

 

رۆژی 15ـی ئایار وەک جەژنی زمانی کوردی لە باکووری کوردستان و ناوچە جیاوازەکان پیرۆز دەکرێت. ئەم رێککەوتە دەگەڕێتەوە بۆ ساڵی 1932، کاتێک جەلادەت عالی بەدرخان یەکەم ژمارەی گۆڤاری "هاوار"ی لە دیمەشقی پایتەختی سووریا بە پیتی لاتینی بڵاوکردەوە. لە ساڵی 2006ـەوە لەسەر داوای پسپۆڕانی زمان، ئەم رۆژە بە فەرمی وەک جەژنی زمانی کوردی دیاریکراوە.

 

لە سیستمی پەروەردەی تورکیادا، تورکی تاکە زمانی فەرمیی خوێندنە. لە ساڵی 2012ـەوە زمانی کوردی (بە هەردوو زاراوەی کرمانجی و زازاکی) وەک وانەی بژاردە بۆ پۆلەکانی 5، 6، 7 و 8 زیاد کراوە.

 

بەپێی ئامارە فەرمییەکان، لە ساڵی خوێندنی 2025-2026 لە تورکیا و باکووری کوردستان، 59 هەزار و 362 قوتابی وانەی کوردییان هەڵبژاردبوو.

 

هەرچەندە چالاکڤانانی زمانی کوردی داوا لە خێزانەکان دەکەن سوود لەو وانە بژاردەیە وەربگرن، بەڵام دەم پارتی و لایەنە کوردییەکان جەخت لەوە دەکەنەوە کە تەنیا "وانەی بژاردە" بەس نییە و پێویستە کوردی ببێتە زمانی فەرمیی خوێندن لە قوتابخانەکاندا.