عەبدوڵڵا گول: ئەمریکا چیدی گەرەنتیکاری ئاسایش نییە و وڵاتانی کەنداو بەدوای جێگرەوەدا دەگەڕێن

 

 

عەبدوڵڵا گول، 11یەمین سەرۆککۆماری تورکیا، لە کاتی بەشداریکردنی لە "29یەمین لووتکەی ئابووریی ئۆراسیا" گوتارێکی پێشکەش کرد و تیشکی خستە سەر گۆڕانکارییە سیاسی و سەربازییەکانی ناوچەکە.

 

عەبدوڵڵا گول ئاماژەی بەوە کرد، ئەمریکا بەهۆی پێشێلکردنی یاسا نێودەوڵەتییەکان، لە درێژخایەندا "زەرەرمەندی یەکەم" دەبێت. گوتیشی: "ئێستا وڵاتانی کەنداو ناچارن بەدوای جێگرەوەی دیکەدا بگەڕێن و چیدی هەموو هێلکەکانیان ناخەنە یەک سەبەتەوە."

 

سەبارەت بە ئەورووپاش، گول بێدەنگیی وڵاتانی کیشوەرەکەی بە "لەدەستدانی شکۆ" ناوبرد و داوای لێکردن نەبنە پاشکۆی سیاسەتەکانی واشنتن. جەختی لەوەش کردەوە کە ئەورووپایەکی بەهێز بەبێ هاوکاریی فراوانی وڵاتانی وەک بەریتانیا و تورکیا، مەحاڵە.

 

سەرۆککۆماری پێشووی تورکیا هۆشداریی دا لە بەکارهێنانی تەکنەلۆژیای "ژیریی دەستکرد" لە شەڕەکانی ئێران و غەززەدا و رایگەیاند، بەکارهێنانی تەکنەلۆژیا بۆ کوشتنی مرۆڤەکان هەموو سنوورە ئەخلاقییەکانی بەزاندووە.

 

عەبدوڵڵا گول رەخنەی لەوە گرت کە چیدی سەرکردەکانی جیهان باس لە مافی مرۆڤ و دیموکراسی ناکەن و تەنیا "هێز" بووەتە پێوەر.

 

گول لە بەشێکی دیکەی گوتارەکەیدا تیشکی خستە سەر گرنگیی چاکسازیی ناوخۆیی و گوتی: "هێزی هەر وڵاتێک لە ناو ماڵەکەیەوە دەستپێدەکات. تاوەکو سەروەریی یاسا و شەفافییەت لە ناوخۆدا بەرقەرار نەبێت، گەشەپێدانی ئابووری و سیاسی مەحاڵە."

 

عەبدوڵڵا گول داوای گەڕانەوەی بۆ بەها مرۆییەکان کرد و رایگەیاند، نابێت گۆڕانکارییە تەکنەلۆژی و سیاسییەکان ببنە هۆی لەناوبردنی کەرامەتی مرۆڤ.