دەم پارتی داوای لێکۆڵینەوە لە ئاستەنگەکانی بەردەم زمانی کوردی دەکات

 

گولجان کاچماز ساییغیت، پەرلەمانتاری دەم پارتی و گوتەبێژی ئینیسیاتیڤی یەکێتیی دیموکراتیک، رۆژی هەینی، 20-02-2026، پێشنیازنامەیەکی پێشکێشی سەرۆکایەتیی پەرلەمانی تورکیا کرد و تێیدا ئاماژەی بەوە کرد، سیاسەتەکانی زمانی فەرمی زیانی زۆری بە فرەزمانی گەیاندووە و بووەتە هۆی ناڕەزایەتیی کورد.

 

ئەو پەرلەمانتارەی دەم پارتی داوای لە پەرلەمان کردووە، بەپێی مادەی 98ی دەستوور و مادەکانی 104 و 105ی پەیڕەوی ناوخۆ، لێکۆڵینەوەیەکی ورد بکرێت بۆ دەستنیشانکردنی ئەو هەنگاوانەی کە پێویستە لە رووی دەستووری و پەروەردەییەوە بۆ پاراستنی زمانەکانی دیکە جگە لە تورکی و گوێگرتن لە داواکاریی گەلی کورد بنرێن.

 

ئەم داواکارییەی دەم پارتی لە کاتێکدایە، ئەمڕۆ هەینی، 20ـی شوبات، دوایین وادەیە بۆ تۆمارکردنی ناوی قوتابیان بۆ وانەی بژاردەی کوردی (کرمانجی و زازاکی) بۆ ساڵی خوێندنی 2026-2027.

 

لە سیستمی پەروەردەی تورکیادا، تورکی تاکە زمانی فەرمیی خوێندنە، بەڵام لە ساڵی 2012ـەوە زمانی کوردی وەک وانەی بژاردە بۆ پۆلەکانی 5، 6، 7 و 8 زیاد کراوە.

 

بەپێی ئامارە فەرمییەکان، لە ساڵی خوێندنی 2025-2026 لە تورکیا و باکووری کوردستان، 59 هەزار و 362 قوتابی وانەی کوردییان بە هەردوو زاراوەی کرمانجی و زازاکی هەڵبژاردبوو.

 

چالاکڤانانی بواری زمانی کوردی داوا لە خێزانەکان دەکەن سوود لەو دەرفەتە وەربگرن، هەرچەندە دەم پارتی و لایەنە کوردییەکان جەخت لەوە دەکەنەوە کە وانەی بژاردە بەس نییە و دەبێت کوردی ببێتە زمانی خوێندن.