مێژوونووسێکی تورک داوای نیشتەجێکردنی "تورکەکانی ئاسیا" لە باکووری کوردستان دەکات

 

 

پرۆفیسۆر دکتۆر ئیلبەر ئۆرتایلی، مێژوونووسی ناسراوی تورک، لە گوتارێکیدا کە رۆژی یەکشەممە، 24-08-2025، لە رۆژنامەی "حورییەت" بڵاویکردەوە، وەک چارەسەرێک بۆ قەیرانی ئاو و وشکەساڵی، پێشنیازی کرد "ئەو گوندانەی لە حەوزی فورات و دیجلە چۆڵبوون، بەو خزمانەمان پڕبکرێنەوە کە لە ئاسیا دەژین".

 

لە کاردانەوەیەکدا، ئەمڕۆ دووشەممە 25-08-2025، مەراڵ دانش بێشتاش، پەرلەمانتاری دەم پارتی لە بازنەی ئەرزەڕۆم، رایگەیاند، ئەو گوتارە "رەگەزپەرستانەیە و کەرامەتی مرۆڤ پێشێل دەکات."

 

بێشتاش لە راگەیێندراوێکدا گوتی: "ئەوەی لەبری چارەسەرکردنی کێشە کۆمەڵایەتییەکان، گەلان وەک بابەتی 'گواستنەوەی دانیشتووان' ببینرێت، بە ئاشکرا تێڕوانینێکی رەگەزپەرستانەیە. جوداخوازی، خودی ئەم گوتار و تێڕوانینە رەگەزپەرستانەیەیە."

 

ئەو پەرلەمانتارەی دەم پارتی ئاماژەی بەوەشکرد، ئەوانەی ئەم جۆرە لێدوانانە دەدەن و خۆیان بە "کەسانی ژیر" دەزانن، یەکسانی و برایەتیی گەلان رەتدەکەنەوە.

 

ئیلبەر ئۆرتایلی لە گوتارەکەیدا نووسیویەتی: "شەڕی ئاو لە شەڕی نەوت گرنگترە". بۆ رووبەڕووبوونەوەی وشکەساڵی پێشنیازی کردووە، "پێویستە جووتیارە کارامەکانی ناوچەی ئویگور و قرغیزە شارەزاکانی بواری ئاژەڵداری بهێندرێنە تورکیا و لەم خاکەدا چالاکی بنوێنن."

 

هەروەها ئۆرتایلی داوای کردووە فرۆشتنی زەویوزار لە "دۆڵی رووها" (پارێزگای ئورفا) بە بیانییەکان رابگیرێت و ئەو زەوییانەی فرۆشراون وەربگیرێنەوە، چونکە "رێگە بە سەرمایەی بیانی لەو ناوچەیەدا نادرێت".

 

بەرامبەر بەمە، مەراڵ دانش بێشتاش جەختی کردەوە کە پێشنیازی "نیشتەجێکردنی تورکە ئۆیغوورەکان" لە حەوزی فورات و دیجلە، "رەتکردنەوەی راستییەکان و شێواندنی مێژووە".

 

بێشتاش گوتی: "چارەسەریی راستەقینە، پاراستنی ئیرادە و کولتوور و مافی ژیانی گەلانە. ئاشتی بە سەپاندن دروست نابێت، بەڵکو بە دادپەروەری دادەمەزرێت."