لەیلا زانا لەبارەی بێشکچی: هێشتا زۆر پێویستمان بە خامەکەی هەیە

 

لەیلا زانا رۆژی شەممە 25-10-2025 لە نەخۆشخانە سەردانی بێشکچیی کرد و لە تۆڕی کۆمەڵایەتیی ئینستاگرام وێنەکەی بڵاویکردەوە.

 

لەیلا هەروەها نووسیویەتی: "پرۆسەی چارەسەریی ئیسماعیل بێشکچیی خۆشەویست، کە هێشتا زۆر پێویستمان بە خامەکەیەتی، لە ئامەد بەرەو باشی دەڕوات".

 

ئەو سیاسەتڤانە هەروەها دەڵێت: "دوای ساڵانێک بە دیداری 'مامۆستا زەردەی کوردان' گەیشتین و هیوای چاکبوونەوەمان بۆی خواست. هیچ گومانیشمان لەوە نییە کە ئەم دۆخە تێدەپەڕێنێت".

 

 

لەکاتێکدا بەشداری لە نۆیەمین فێستڤاڵی سینەمای ئامەد کردبوو، رۆژی 27-9-2025 ئیسماعیل بێشکچی تەندروستی تێکچوو و بەپەلە گەیێندرایە نەخۆشخانە.

 

ئەو رۆژە دووەمین رۆژی فێستڤاڵەکە بوو و یەکێک لەو بەرهەمانەی لە بەرنامەدا بوو، بایۆگرافیای (ئیسماعیلی ئێمە) بوو، کە تایبەت بوو بە ژیان و بەسەرهاتەکانی بێشکچی.

 

بێشکچی لەوکاتەی گوتاری پێشکێش دەکرد، تەندروستیی تێکچوو و کەوتە سەر زەوی. لە نەخۆشخانەی کۆلیژی پزیشکیی زانکۆی دیجلە خرایە ژێر چاودێری.

 

 

- رۆژی 7-1-1939 لە پارێزگای چۆرومی تورکیا لەدایکبووە

- 1962 بەشی زانستە سیاسییەکانی لە زانکۆی ئەنقەرە تەواوکردووە

- 1965 دکتۆرای بەدەستهێناوە

- بەهۆی داکۆکیکردنی لە کورد 17 ساڵ زیندانی کراوە

- 1987 بۆ خەڵاتی ئاشتیی نۆبڵ بەربژێر بوو

- زیاتر لە 35 کتێبی هەیە