تورکیا لە 15 هەزار مامۆستا، تەنیا 6 مامۆستای زمانی کوردیی دامەزراند

 

 

رۆژی دووشەممە 24ی تشرینی دووەمی 2025 ئەنجامی دامەزراندنی مامۆستایان لە تورکیا و باکووری کوردستان، بۆ ساڵی خوێندنی 2025 - 2026 ئاشکرا کرا.

 

بەپێی ئەنجامەکان، لە پلەی یەکەمدا مامۆستای پۆل دێت بە چوار هەزار و 378 مامۆستا، دوای ئەویش پەروەردەی تایبەت بە سێ هەزار و 8 مامۆستا و وانەی ئایینی بە هەزار و 802 مامۆستا دێت.

 

لەو 15 هەزار دامەزراندنەدا تەنیا پێنج مامۆستا بۆ زاراوەی کرمانجی و یەک مامۆستا بۆ زاراوەی کرمانجکی (زازاکی) دامەزراوە.

 

بەگوێرەی ئامارەکانی وەزارەتی پەروەردەی تورکیا، لەنێوان ساڵانی 2014 بۆ 2025، 153 مامۆستا بۆ زاراوەی کرمانجی و 47 مامۆستا بۆ زاراوەی کرمانجکی-زازاکی دامەزراون.

 

لە ساڵی خوێندنی 2024-2025دا، لە 196 قوتابخانەی فەرمیی سەر بە وەزارەتی پەروەردەی تورکیا، 27 هەزار و 15 قوتابی وانەی کوردی بە شێوەزارەی کرمانجییان هەڵبژاردبوو و لە 30 قوتابخانەشدا سێ هەزار و 510 قوتابی وانەی کوردی بە شێوەزاری کرمانجکی هەڵبژاردبوو.