لە کۆجائەلیی تورکیا بەهۆی داڕمانی باڵەخانەیەک چوار کەسی یەک خێزان گیانیان لەدەستدا

 

دوای ئەوەی بەیانیی ئەمڕۆ پێنجشەممە تەرمی دایک و باوکی ئەو خێزانە دەرهێنرا، کە دوێنێ کەوتنە ژێر داروپەردوو، ژمارەی گیانلەدەستدان گەیشتە چوار کەس.

 

رووداوەکە دوێنێ چوارشەممە 29-10-2025 لە شارۆچکەی گەبزەی سەر بە کۆجائەلی روویدا. باڵەخانەیەکی 7 نهۆمی رووخا و 5 کەس کە ئەندامی هەمان ماڵبات بوون، لەژێر داروپەردوو مانەوە. 

 

تیمەکانی بەرگریی شارستانی، ئافاد و رزگارکردن، گەیشتنە شوێنی رووداوەکە و دەست بەکار بوون.

 

محەممەد ئەمیر بیلیر-ی تەمەن 12 ساڵ، خەیرونیسا بیلیر-ی تەمەن 14 ساڵ، لەڤەنت بیلیر-ی باوک (44 ساڵ) و ئەمینە بیلیری دایکی خێزانەکە (37 ساڵ) گیانیان لەدەستدابوو و تەرمەکانیان دەرهێنرا.

 

دیلارا بیلیر کە تەمەنی 18 ساڵە، تاکە ئەندامی رزگاربووە لەو ماڵباتە و بە زیندوویی لەژێر داروپەردوو دەرهێنرا.

 

محەممەد ئاکتاش، یاریدەدەری وەزیری ناوخۆی تورکیا، دوای دەرهێنانی تەرمی دایک و باوکەکە، بەیانیی ئەمڕۆ پێنجشەممە 30-10-2025 بە میدیای وڵاتەکەی رایگەیاند: "تەرمی دایک و باوک، پێش کەمێک دەرهێنران. بەداخەوە 4 ئەندامی ماڵباتە 5 کەسییەکە گیانیان لەدەستدا."

 

ئاکتاش گوتی، سەرەتا تەرمی باوکەکە، دواتریش تەرمی دایکەکە دۆزرایەوە و گوتی: "تەنیا دیلارا، کچە گەورەی ماڵباتەکە کە تەمەنی 18 ساڵە بە زیندوویی دەرهێنرا. سەردانی دیلارامان کرد، لە نەخۆشخانەیە و تەندروستیی باشە".

 

کارەکانی گەڕان و پشکنین کۆتایی هات و ئاکتاش رایگەیاند، ستافەکانیان ماوەی 19 کاژێر لە هەوڵی گەڕان و رزگارکردندا بوون و گوتی: "کۆی گشتی 913 کارمەند، کە 628ـیان کارمەندی گەڕان و رزگارکردن بوون، بە دڵسۆزییەوە ئەرکی خۆیانیان بەجێهێنا و پێشبڕکێیان لەگەڵ کاتدا کرد. 161 ئۆتۆمبێلی رزگارکردن، 6 سەگ، 10 کامێرای هەستیار و گوێگرتنی ژێر داروپەردوو بەکارهێنران".

 

لە دوای رووداوەکە 12 باڵەخانەی ناوچەکە چۆڵکران. 45 ماڵبات لەو باڵەخانانە بوون.

 

هەر دوێنێ 9 لەو ماڵباتانە رۆیشتنە لای خزمانیان و ئەوانی دیکەش لەلایەن شارەوانییەوە میوانداری کران.