كە باسی كۆنگرە دەكەین، باسی چی دەكەین؟
رەنگە باسكردن لە گرنگی بەستنی كۆنگرەی یەكێتی، بووبێتە بابەتێكی وەرزی و هەندێكجاریش بە جۆرێك لە جۆرەكان بووبێتە زەنگێك بۆ باس و خواسی كادیر لەسەر شەرعییەت و ناشەرعیبوونی هەڤاڵانی سەرەوەمان «لەگەڵ رێزمدا بۆ هەموویان» كە لە كۆنگرەی سێ متمانەی یەكێتییان پێبەخشرا.
بە چەندین هۆكاری جیاواز و ئێجگار واقیعی، بەستنی كۆنگرە بۆ یەكێتیی نیشتیمانیی كوردستان، پێویستییەكە كە بواری دواخستنی نەماوە و بەرهەمهێنانی هەر بیانوویەكیش بۆ نەبەستنی، راستەوخۆ پرۆمۆتكردنی ئەو هەڤاڵانەیە كە فرسەت لەدەستنادەن بۆ گەورەكردنی بەرژەوەندییەكانی خۆیان و پاراستنیان. ئەو بەرژەوەندییانەش، نەك خزمەتی یەكێتی و یەكێتییەكان و میللەتەكەمان ناكەن، بەڵكو تاوەكو دێت یەكێتی لە ئەركە چارەنووسسازەكانی خۆی دووردەخەنەوە و كارێكیان كردووە، حیزبەكەی مام، بئ رووئیا و بێ پلان بێت. لە كاتێكدا ئەزموونی حكومەتی هەرێمی كوردستان، بە پلان و خەبات و خوێن و وردبینی یەكێتی دروستبووە.
لە پەیامەكەی (قوبادی مام جەلال)دا بۆ یادی ٤٤ ساڵەی دامەزراندنی یەكێتی، ئاشكرا ئەو گوشارە زۆرەمان بینی كە كادیرانی یەكێتی بۆ بەستنی كۆنگرە دروستیانكردووە تاوەكو بتوانرێت نەوەی نوێی یەكێتییەكان خۆیان بێنە سەرەوە و كار بۆ ئایندەی خۆیان و یەكێتییەكەیان بكەن، چونكە بەڕێوەبردنی حیزب لەم سەردەمەدا، ئاڵۆزتر بووە و پێویستی بە تێگەیشتنی نوێیە بۆ بارودۆخەكە .
ئاخر گۆڕانكارییەكان خێران، ئاڵنگارییەكان زۆرن، مەترسییەكان گەورەن. هەموو ئەمانەش، یەكێتی بەو لەشقورسییەی ئێستایەوە ناتوانێ بەڕێوەیان ببات.
لە ئاستی ناوخۆی كوردستاندا، بەبۆچوونی لایەنە سیاسییەكان، یەكێتی ئێستا خەریكە لەوە بكەوێت بتوانێ مناوەرە و مانۆڕی سیاسی خۆی بكات و پڕۆژەی هاوبەش لەگەڵ حیزبەكانی دیكەدا دروستبكات و خەباتیان بۆ بكات، لەبەرئەوەی روئیای یەكێتی بۆ گەلێك مەسەلەی گرنگ و مێژوویی، نەك هەر بۆ نەیار و دۆست، بگرە بۆ یەكێتییەكانیش، هەندێكجار روون نییە. لە كاتێكدا لە مێژووی زیاتر لە چل ساڵی رابردوودا، یەكێتی تاكە حیزب بووە كە خەباتی بەرەیی بە ئامانج گەیاندووە.
هەموو ئەمانەش، لە بڕوا و تێگەیشتنە فراوانەكەی مام-ەوە بوو كە یەكگرتوویی نێو ماڵی كوردی، بە گرەنتی سەركەوتن دەزانی. بۆیە یەكێتی دەبێ لەوڕووەوە بگەڕێتەوە سەر ئەو پرەنسیپە و هەموو ئەو ئامانجانەی كە بە رێگەی پڕۆژەی هاوبەش بەدەستدێت، بە پڕۆژەی خۆی بزانێت.
لە ئاستی عێراقدا، یەكێتی پێشڕەوی خەباتی نەتەوەیی بووە، بەدەستهێنەری چەندین دەستكەوتی گەورەبووە و لە دەستووری هەمیشەییشدا، چەسپاوە. لەگەڵ ئەوەشدا تائێستا كەركووك و ناوچە دابڕێنراوەكان لە مەترسیی حەقیقیدان و یەكێتی خۆی بە خاوەنیان دەزانێت. لەوڕووەوە یەكێتی پێویستی بە هیممەتێكە تاوەكو لەگەڵ ئەو مێژووە پڕ شانازییەدا بێتەوە كە بۆ كەركوكی كردووە. هەموو ئەو ئامانجانەش، بە یەكێتییەكی سازو تەبا و پتەو و یەكدەست بەدیدێت.
لە چەند ساڵی رابردوودا، زنجیرەیەك بیانووی جۆراجۆر هەبوون، شەڕی داعش، ترسی جیابوونەوەی ناوخۆیی، قەیرانی دارایی، ریفراندۆم، هەڵبژاردنەكان. بەڵام ئێستا هیچ هۆكارێك نییە و ئیتر حەقە كادیرانی یەكێتی بە چاوی ناتەندرووست سەیری ئەوانە بكەن كە لەمپەر لەبەردەم بەستنی كۆنگرەدا دروستدەكەن و بەرژەوەندی و هۆكاری بۆ دروستدەكەن.
بۆیە بەرپرسیارێتی هەموو یەكێتییەكانە هەر لە ئەندامێكی سادەوە تاوەكو جێگری سكرتێری یەكێتی كاری بۆ بكەن و سەركردایەتییش ئەركی مێژوویی خۆیان ئەنجامبدەن و رۆژی كۆنگرە دیاریبكەن تاوەكو هەر لە چوارچێوەی دروشم و راگەیێندراوی میدیاییدا نەمێنێتەوە.