توركیا و ئێران و رووخانی سەروەری عێراق

ئەفسانەكانی رووخان: لەوانەیە هەندێك كەسی نەناس بێنە نێو ژیانتەوەو بەڵێنی خۆشبەختی، هاوكاری و دڵسۆزیت پێبدەن، لەكاتێكدا خۆیان كەلەشی بەتاڵن لە هەموو كردەوەیەكی راستگۆیانە . لەوانەیە پێگە و شێوەیان هیوا و دڵنیاییت پێببەخشن ، بەڵام لە راستیدا هیچیان پێنییە جگە لە بەڵێن، ئەگەر دڵێكی نامۆ ناكام بوو بەهۆی كەوتنی ئەفسانەی بەڵێنەكان، ئەوا هیچ ئازار و خەمێك بەقەدەر ئەوە نییە ، بەڵام هیچ شتێك لەوە كارەساتتر نییە كە گەلێك ناكام ببێت . لە زنجیرەی وتارەكانمدا لە تۆڕی میدیایی رووداو دا سەبارەت بە ئەفسانەكانی رووخان، باسی هەموو ئەو چەمك و بەڵێنانە دەكەم كە لەسەر خاكی عێراق رووخان و، بۆ خوێنەر باسی ئەو شتانە دەكەم كە لەوانەیە بە خەیاڵیدا نەیێن سەبارەت بەوەی روودەدات.

یەكەمین ئەفسانە كە لە عێراقدا رووخا، ئەفسانەی سەروەری بوو . ئەو ئەفسانەی تەنیا بە هاتنی ئەردۆغان بۆ موسڵ نەڕووخا، بەڵكو لەساڵی 2003ەوە رووخاوە، دوای ئەوەی بەغدا بووە گۆڕەپانی بڕیارەكانی تاران و واشنتن، بەسەرچاوەگرتن لە بیرۆكەی دروستبوونی هەژموونی ئێران و باڵادەستیی فارسیی لەسەر خاكی عێراق و، سنوورداربوونی كاری توركیا لە سووریا بەهۆی هاتنی رووسیا بۆ سەر گۆڕەپانی رووبەڕووبوونەوە، ئەوەش پاڵی بە توركیاوەنا ئاراستەی بكاتە عێراق و بەتایبەتیش موسڵ ، كە جێگەی چاوتێبڕینی سوڵتانە كۆنەكانی بووە، لەپێناو هاوسەنگیی دروستكردن لەگەڵ هێزەكانی دیكەدا.

بەهەموو ئەوانە دەڵێم كە باسی ئەوە دەكەن كە سەروەری، هێڵی سووری 2016یە، زەحمەت نەبێت ساڵی 2003 لەكوێبوون كاتێك ئێران بووە پاشای نەهێشتنی سەروەری عێراق بەو حیزبانەی كە خۆی بە ئارەزووی خۆیان دەیانجوڵێنێت، بە ئارەزووی خۆیان گەندەڵییان بڵاوكردەوەو، بودجەی عێراقیان دزی، ئەوكات لەكوێبوون؟ وڵاتی شارستانییەتی بووە گۆڕەپانی ركابەری لایەنەكانی هاوپەیمانییەكی نێودەوڵەتیی جیهانی، ئێران، توركیا، رووسیا و داعش، كەی باسی ئەوەتانكردووە؟ ئێستا توركیا دەڵێ ئەوە مافی منە بەپێی مادەیەكی دەستووری بەپێی پێویستییەكانی كاتی شەڕ ! ئێرانیش دەڵێ توركیا ئەو مافەی نییە، سیاسییەكی دیكەش هەڕەشەی هێنانی رووسیا دەكات بۆ عێراق بۆ بەرەنگاربوونەوەی هەژموونی توركیا " خۆش حەچی " و بووینەتە " خان جغان".

بۆیەش خوێنەری خۆشەویست، ئەمە وەك رێسایەك وەربگرە، هەر دەوڵەتێكی هەرێمایەتی بێتە عێراقەوە بە بیانووی بەرەنگاربوونەوەی تیرۆر یان " خواردنی كەباب " و بیانووی دیكە، ئەوا بۆ بەرژەوەندییەكانی خۆی دێت، نەك بۆ بەرژەوەندی تۆ، ئەو لێرەیە بۆ بەدەستهێنانی هەندێ دەستكەوتی دیاریكراو، بۆیەش باشترە ئێمە ئەمڕۆ دژی هەموو دەستوەردانەكان بوەستینەوە، نەك تەنیا بەرامبەر توركیا. هەموویان جێگەی لێپێچینەوەن و سەروەری هێڵی سوورە بەرامبەر هەمووان، بەڵام لێرەدا دان بەوە دادەنێم كە رابوون و خۆپیشاندانەكەمان بەرامبەر هەموو دەستوەردانە دەرەكییەكان دوای ئەوەیە كە هەموو شتێك رۆیشتووە، ئەفسانەی سەروەری رووخاوە، ئەی چیبكەین! ئەم رۆژانە یەكێك لە هونەرەكانی سەركردایەتیكردن بووەتە رووخانی سەروەری.

*میدیاكار و پێشكەشكارێكی نێوداری عێراقی و عەرەبە، ئەو وتارەی بەتایبەت بۆ (رووداو) نووسیوە.