داعش و خوشكە دەمامكدارەكانی

پێموایە پەلاماری ئەمجارەی ئیسلامییەكانی فەرەنسا دەبێتە هۆیەك بۆئەوەی تەواوی جیهانی پێشكەوتوو بە بڕیارەكانی كۆچبەری و پێكەوەژیان و مافی مرۆڤدا بچێتەوە و فەزای ئازادیی تاك تەسكتر بكەن، ئەو دەسكەوتانەی كە بەسەدان ساڵ خوێنی لەپێناودا رژاوەو فەیلەسوفی مەزن كار و شەونخونییان كردووە لەپێناو ئەو مافانەی كە بە دەستكەوتی هەرە گەورەی مرۆڤایەتی دەژمێردرێن.

جگە لەمەش رێگا بۆ شەپۆلی راست و راستی رادیكال لە وڵاتە پێشكەوتووەكان خۆشدەكات بۆ ئەوەی ببنە قەڵغان بۆ ئەو شەپۆلە ترسناكەی كە مەترسی راستەوخۆی لەسەر ژیار و پێشكەوتنی مرۆڤایەتی بەگشتی هەیە، راستی رادیكاڵ لەوەی ئێمە زۆر باشتر نییە و ئەگەر رێگای پێبدرێت زۆر بەتوندی وەڵامی كارە تیرۆریستییەكان دەدەنەوە و ئەوروپا و وڵاتە پێشكەوتووەكان دەكەنە دۆزەخ بۆ بیانییەكان، جگە لەوەی ئەم رووداوە تیرۆریستییە یەكێكە لە رووداوە ترسناكەكان بۆ بەها و ئاكاری لیبراڵی لە جیهان و تاوانێكی گەورەشە، بەڵام دەبینین ئێستاش خەڵكی وا هەن پێیانوایە كە كارێكی چاك كراوەو سەركەوتنە بۆ ئیسلام، لەبەرئەوەی باسی موقەدەساتی ئیسلامیان كردووە و موستەحەقن وایان بەسەربێت!

راگەیاندن و میدیاكانی كوردستان لە شەش مانگی رابردوودا هیچیان نەهێشتووە لەسەر داعش نەیڵێن، باسی مەترسی و خراپكاری و وێرانكاریی داعشیان كردووە، بەڵام كەسێك باسی خوشكەكانی نەكردووە. ئەو خوشكانەی كە بەهیچ شێوەیەك لەداعش دانابڕێن، تەنانەت ئەگەر زڕخوشكیش بن، هەموویان لەبن نیقاب وەك شانەی نووستوو خۆیان بە جۆرەها دەمامكەوە شاردووەتەوە، ئەو خوشكە سەرپۆشانەی كە تەنیا لە حزوور و دەسەڵاتی ئەودا پۆشیەكانیان هەڵدەگرن و چارە ناشیرینەكەی خۆیان پێشانی خەڵك دەدەن، كاتێك خوشكە گەورەكەیان لە دەسەڵات نابێ، لەژێر دەمامكی حیزبی رێگاپێدراو بەشداری پرۆسەی سیاسی دەكەن، بۆیەش ئێمە ناتوانین بزانین كە داعش چەند خوشكی هەیە، لەراستیشدا پێشمەرگە بە زەند و بازووی پۆڵایین نەیانهێشت بزانین كە چەند خوشكی لەكوردستان هەیە، خوا نەكات ئەگەر داعش كوردستانی داگیركردبا ئەوسا دەمانزانی چەند خوشك و زڕخوشك و خوشكەزای هەتیوی هەیە، ئەو خوشكانەن كە زۆر لەداعش ترسناكترن، چونكە شاردراوەن و ئێستاش پێیانوایە ئاینێكی ئاسمانی بەچەند كاریكاتۆرێك سووك دەبێت.

پێموانییە كەسێك هەبێت بەقەدەر من هاتنی "ئیسلامی سیاسی" پێ ناخۆش بێت، چونكە قەناعەتێكی زۆرم بەوە هەیە كە تێكەڵكردنی ئاینی پیرۆز لەگەڵ سیاسەت، هەردووكیان دادەڕمێنێ و وڵات دەكاتە دۆزەخێك كە تەنها دڕندەی وەكو خۆیان بتوانن لەناویدا بژین، بەڵام كە كارەكە دێتە سەر بەرژەوەندیی باڵا و ئاسایشی نەتەوەیی، یەكسەر ستۆپێك دەگرم و جارێكی دیكە پێدادەچمەوە، ئایا داعش جگە لەو زیان و خراپیانەی كە هەموومان دەیزانین، چ سوودێكی بۆ ئێمە هەبووە و لەدواڕۆژدا چ سوودێكی دەبێت؟ دەبێ بتوانین بە دیدێكی دوور لە سۆز و هەڵچوون چاكەكانیشی بخوێنینەوەو لەپێناو بەرژەوەندییە نەتەوەییەكانمان بیانكەین بە خاڵی وەبەرهێنان بۆ داهاتوو، چونكە سیاسەتی سەركەوتوو ئەوەیە كە بتوانی رووداوە خراپ و مەترسیدارەكان لە بەرژەوەندیی خۆماندا بقۆزینەوە و بیانكەین بە خاڵی پۆزەتیڤ بۆ دواڕۆژی نەتەوەمان.

 هاتنی داعش جگە لە زیان و مەترسییەكەی بۆ سەر ئەزموونی كوردستان و رژاندنی خوێنی بەسەدان پێشمەرگە و تاڵانكردن و رفاندنی ژنی كورد، چاكەی خۆیشی هەبووە، بەندی سەدوچلی دەستووری عێراقی كرد بە فاكت، حكومەتی بەغدای وا لاوازكرد كە بتوانین وتووێژی لەگەڵ بكەین، كوردی كرد بەیەك دەنگ، پێشمەرگەی كرد بەهێزێكی ناسراو لەسەر ئاستی جیهان و ئێمەی گورجوگۆڵ كردەوە، بۆیەش بەدوودڵییەوە ناڵێم: لەناوبردنی داعش بەیەكجارەكی لەبەرژەوەندی ئێمەدا نییە، زیانەكان كراون و جارێكی دی وەكو خۆی لێنایەتەوە، با داعش بمێنێ، بەڵام دوور لەئێمە و تەنها وەك خاڵێكی فشار لەسەر بەغدا بۆ گەیشتن بە ئامانجە نەتەوەییەكانمان، وابزانم دوای هەلی داعش، جارێكی دیكە ئەمریكا و هاوپەیمانەكان هەلێكی واچاكمان بۆ ناڕەخسێنن.

بڕوایەكی زۆرم بەوە هەیە كە شتێك نییە بەناوی قۆناغی پاش داعش، داعش خاڵی گۆڕینی یەكجارەكییە، كە جارێكی دیكە گشت دەڤەرەكە وەكو خۆی لێنایەتەوە و هێڵ و سنووری نوێ بۆ دەڤەرەكە دادەمەزرێن و داعشیش بەفۆڕمێكی نیانتر خۆی دەكاتە نوێنەری سوننە و مەترسی ئەوەشی هەیە لەگەڵ بەغدا بەڕێككەوتنێك بگەن كە زیانی ئێمەی تێدادەبێت، بۆیەش دەبینین كاتێك داعش بەهێزدەبێ، بەغدا خۆی كڕدەكات و بودجە دەنێرێت و خۆی دەكاتە پیاوچاك، هەر ئەوەندەی داعش لاوازبوو، بەغدا بەزمانێكی تر و تۆنێكی تر قسەمان لەگەڵ دەكات، بۆیەش بەهەڵە ناچم ئەگەر بڵێم: مفاوەزاتمان لەگەڵ بەغدا دەبێ لەكاتێكی وادابێت كە بەغدا لەوپەڕی لاوازیدا بێت لەدەستی داعش، ئەگینا دەرەقەتی ناهێین، بەڵگە بۆ ئەم قسانەش مادەی 140 و شوێنە دابڕاوەكانی كوردستانن كە ئێستا لەڕووی لەشكرییەوە لەدەست پێشمەرگەدان، بەڵام هیچ جارێك دەسكەوتی لەشكری كۆتایی بە ریالیتی ناهێنێت، دەشێ یارمەتیدەرێك بێت بۆ ئەنجامدانی پێكهاتنی سیاسی لەبەرژەوەندی خۆمان، بەڵام خۆی لەخۆیدا كۆتاییهێنەر نییەو دەشێ بەیەك بڕیاری سیاسی بویەرەكە لەپێشان خراپتری لێبێت و وانە هەزارجارییەكەی كە هیچی لێ فێرنەبووین دووبارە ببێتەوە، چونكە مفاوزی چاكمان نییە و ناتوانین بەمفاوەزات نەك خاكی خۆمان تەنانەت تاشەبەردێكیش لەبەردەستی حكومەتی بەغدا دەربێنین.

ئێستا بێ ئەوەی چاوەڕێی چاكە و خراپەی عەبادی بكەین، دەبێ واز لە قەیرانی مووچە بێنین و دەستبەجێ مفاوەزاتی شوێنە كێشە لەسەرەكان بەڕێگای دیپلۆماسی و لەژێر چاودێریی نەتەوە یەكگرتووەكان و هێزە باڵادەستەكان بكەین، بۆ ئەوەی ئەو دەسكەوتانەی لە مەیدانی جەنگ بەدەستمان كەوتوون، لە سەر مێزی دانوستاندن نەیاندۆڕێنین.
كۆتایی: داعش باشترە لە خوشكەكانی، چونكە بێ دەمامكە.