كۆمەڵكوژیی فەللوجە.. مەرگەساتێكی مێژوویی

ئێستا كە ئەو وتارە دەنووسم، دەزانم كە فكری عێراقی گۆڕاوەو چیتر فكرە تایفییە ماوە بەسەرچووەكانی پێ قبووڵ نییە. كە ئەم وتارە دەنووسم بڕوای تەواوم بەوە هەیە كە خوێنەر بە تەواوی دەزانێت كە من باسی حەق دەكەم و پشتیوانی لە هاونیشتمانیی راپەڕیوی عێراقی دەكەم لە دژی زۆرداری لە بەسرا، ناسریە، دیوانییە، بابل، كەربەلا، نەجەف و بەغدا. لەهەمانكاتدا پشتیوانی لە عێراقیی قەهرخواردوو دەكەم، بەهۆی شەڕی نێوان داعش و هێزكانی هاوپەیمانان لە ناوچەكانی رۆژئاوا وەك، ئەنبار، سەلاحەدین، باكووری موسڵ و رۆژهەڵاتی دیالە. چونكە من بەخۆشەویستی خەڵكی وڵاتەكەم پەروەردە بوومە، بە هەموو پێكهاتەكانییەوە.

من ئەمڕۆ كە بۆ ئێوە دەنووسم، ئازارێكی زۆر دەمگوشێت بەهۆی دیمەنی كوژرانی منداڵان و ژنان لە نەخۆشخانەی لەدایكبوونی فەللوجە، بەو مووشەكانەی كە سەرچاوەكەیان هێزە عێراقییەكانمان بوون.

دوای ئەوەی داعش چووە ناو فەللوجەوە، فەللوجەییەكان لە ناخۆشترین رۆژەكانیاندا دەژین، چونكە كەوتوونەتە نێوان چەكوچی داعش و پشتیوانەكانیان و سندانی هاوپەیمانان و هێرشەكانی سووپا. بێگومان ئەوەمان لەیاد ناچێت، چۆن هەندێك شێخی عەشیرەتەكانی فەللوجە بەیعەتیان بە داعش دا و، چۆن دیلەكەی سوپای عێراقیان لەسێدارەدا، كە خوێنی لە جەرگی مرۆڤ دەهێنا. بەڵام لەلایەكی دیكەوە، هەندێك شێخی فەللوجە بەهێزەوە لەبەردەم ئەو رێكخراوە تیرۆریستییەدا وەستاون. چۆن داعش كوڕی باشوور دەكوژێت، كە كەسوكاری خۆی بەجێهێشتوون بۆ بەرەنگاربوونەوەی ئازایانەی داعش لە فەللوجە، ئەو رێكخراوە تیرۆریستییە هەموو ئەو فەللوجەییانەش دەكوژێت كە شانبەشانی برا باشوورییەكانی، شەڕی داعش دەكەن.

پێش ئەوەی پەیامەكەی خۆم لەو وتارەدا بخەمەڕوو، پێویستە لەسەرم لەگەڵ ئێوەدا برینی ساڕێژنەبووی خەڵكی فەللوجە بەبیر بێنمەوە، كە لە دوای داگیركردنی عێراق لەلایەن ئەمریكاوە، هێزە هاوبەشەكانی بەریتانیا و ئەمریكا لە ساڵی 2003 ئەو شارەیان بۆمبابارانكرد، كە هەندێكیان بە چەكی قەدەخەكراوی نێودەوڵەتی بوون. برینەكانیان ساڕێژنەبوون كە پێش چەند ساڵ خەڵكی فەللوجە كۆبوونەوە بۆ خۆپیشاندان و سیاسییە سوننەكانیش سوورای شەپۆلەكە بوون، بەوشێوەیەش مالیكی سەركووتیكردن، چونكە وەك هەڕەشەیەكی تەماشاكرد لەسەر بوونی خۆی لە دەسەڵاتدا. مالیكی گوللەی بە سینگی رووتی خەڵكەوەنا و میدیاش بێدەنگ بوو، بەوجۆرە خەڵكی فەللوجە لەململانێی دەسەڵاتدا بوونە قووربانی.

بەبێ درێژدادڕی، ئەمڕۆ دووژمنمان یەكە و هەڵەی سەربازیی وەك ئەوەی نەخۆشخانەی لەدایكبوونی فەللوجە لەوانەیە بمانگەڕێننەوە بۆ چوارگۆشەی رق و كینە. لەبەرئەوەش لەو بڕوایەدام بۆمبابارانی بەبێ گەمارۆدان و هێرشی مەیدانیی و بەلانیكەم چۆڵكردنی ناوچەكان لە دانیشتووان، شێوازێكی بێسوودە و دەبێتە هۆی كارەساتی مرۆیی گەورە. نازانم ئایا بەڕاستی هێزەكانی هاوپەیمانان ئێستا ناتوانن بە وردی ئامانجەكانی خۆیان دەستنیشان بكەن ؟ ئایا هێزەكانی هاوپەیمانی نێودەوڵەتی توانای ئەوەیان نییە ئامێری سەربازیی خاوەن توانای دیاریكردنی ئامانجە سەربازییەكان بدەنە هێزەكانی عێراق ؟ ئەمڕۆ دەرفەتێك لەبەردەم حكومەتی عەبادی هەیە بۆ پشتیوانیكردنی حەشدی عەشیرەتەكان و دروستكردنی یەكگرتوویی لەنێوان هێزە عێراقییەكان بۆ لەنێوبردنی داعش بە كەمترین زیانە مرۆییە مەدەنییەكان. بۆ رێزگرتن لەو بێتاوانانەی خوێیان رژێنرا، ستراتیژیەتی مامەڵەكردن لەگەڵ فەللوجە بگۆڕن. مەدەنییەكان لە فەللوجە دەربێنن و شەڕەكەتان راستەوخۆ لەگەڵ داعش و هاوپەیمانەكانی بكەن. گۆڕینی ستراتیژییەكانیش بۆ بەدیهێنانی ئامانجەكان، تایبەتمەندیی سەركردە سەركەوتووەكانی جەنگە.