ئەردۆغان: لە دڵەوە پیرۆزبایی لە ئامەدسپۆر و برا دیاربەکرییەکانم دەکەم

 

رەجەب تەیب ئەردۆغان، سەرۆککۆماری تورکیا لە تۆڕی کۆمەڵایەتیی ئێکس بڵاویکردەوە: "پیرۆزبایی لە ئامەدسپۆر دەکەم کە ساڵی داهاتوو لە خولی نایاب نوێنەرایەتیی دیاربەکرمان دەکات. لە ناخی دڵمەوە پیرۆزبایی لە کۆمەڵگەی وەرزشیی ئامەدسپۆر و برا دیاربەکرییەکانم دەکەم و هیوای سەرکەوتنیان بۆ دەخوازم".

 

لە دوایین یاریی خولی یانە پلە یەکەکانی تورکیادا، ئەمڕۆ یانەی ئامەدسپۆر لە دەرەوەی یاریگەی خۆیدا رووبەڕووی ئیدرسپۆر بووەوە و هەردوو یانە بە ئەنجامی 3 گۆڵ یەکسان بوون.

 

ئەم یەکسانبوونە لەکاتێکدابوو کە ئەسەنلەر ئەڕۆک سپۆر کە رکابەرەکەی ئامەدسپۆر بوو، یەکسان بوو و نەیتوانی لە یانەی پەندیک سپۆر بباتەوە کە ئەم ئەنجامە وایکرد ئامەدسپۆر راستەوخۆ سەربکەوێت.   

 

ئامەدسپۆر بەو یەکسانبوونەی لەگەڵ ئیدرسپۆر کۆی خاڵەکانی گەیاندە 74 لە کۆی 38 یاری و لە خولی پلە یەکەوە چووە خولی نایابی تورکیا.