لووتکەی لالیگا؛ بارسێلۆنا بۆ تۆڵەکردنەوە دەبێتە میوانی ئاتلێتیکۆ مەدرید

 

 

لە یاریی لووتکەی رکابەرییەکانی گەڕی 30ـی خولی ئیسپانیا، ئەمشەو کاژێر 22:00 یانەی ئاتلێتیکۆ مەدرید میوانداریی بارسێلۆنا دەکات و ئەمە بەهێزترین یاریی گەڕەکە دەبێت.

 

بارسێلۆنا لەکاتێکدا ئەم یارییە بەرامبەر رۆخی بلانکۆس دەکات، مانگێک لەومەبەر لە قۆناخی پێشکۆتایی جامی شای ئیسپانیا، بەرامبەر ئاتلێتیکۆ مەدرید کرایە دەرەوە و دەیەوێت تۆڵەی ئەو شکستەی بکاتەوە.

 

جگە لەوەش لە چامپیۆنزلیگیشدا رکابەرەکەی هەر ئاتلێتیکۆ مەدریدە و یارییەکە هێندەی دیکە چاوی لەسەر دەبێت.

 

بەر لەم یارییە هەریەکە لە ژول کۆندێ و ئەلیخاندرۆ باڵدێ گەڕاونەتەوە نێو مەشق و راهێنانەکان و بۆ یارییەکەی ئەمشەو ئامادەن.

 

فرێنکی دی یۆنگ بەهۆی پێکانەوە بەشداری لە یارییەکە گرنگەکەدا ناکات.

 

لە ریزەکانی ئاتلێتیکۆ مەدرید، مارکۆس یۆرێنتی، بەهۆی کەڵەکەبوونی کارتە زەردەکانی، یان ئۆبلاک، پابلۆ باریۆس و رۆدریگۆ مێندۆزا بەهۆی پێکانەوە بەشداری لە یارییەکەدا ناکەن.

 

پێش ئەنجامدانی ئەم یارییە، بارسێلۆنا بە 73 خاڵ لە پلەی یەکەمی ریزبەندی خولی ئیسپانیایە، ئاتلێتیکۆ مەدرید 57 خاڵی هەیە و لە پلەی چوارەمی ریزبەندی خولەکەیە.

 

بارسا چوار خاڵ لە ریال مەدریدی دووەمی ریزبەندی خولەکەوە دوورە، دۆڕان لە یارییەکەی ئەمشەودا ئەوان دەخاتە نێو رکابەرییەکی زەحمەت و رکابەریکردن لەسەر خولەکە زیندوو دەکاتەوە.