هەموو شتێک بۆ تیروپشکی مۆندیالی 2026 ئامادەیە

 

 

ئەمریکا ئامادەکارییەکانی بۆ ئەنجامدانی رێوڕەسمێکی گەورە، شایستە و ناوازە بۆ مۆندیالی 2026 ئامادەکردووە، بەرپرس و راهێنەرانی وڵاتانی بەشدار، دەیان کەسایەتی و ئەستێرەی بەنێوبانگی تۆپێ، لەگەڵ دۆناڵد ترەمپ، سەرۆکی ئەمریکا و جیانی ئینفانتینۆ ئامادەی رێوڕەسمی راکێشانی تیروپشکی مۆندیالی 2026 دەکەن.

 

رێوڕەسمەکە کاژێر 20:00ـی شەوی هەینی لە سەنتەری جۆن کێنێدی بەڕێوەدەچێت، کە یەکێکە لە سەرنجڕاکێشترین و جوانترین شوێنەکانی واشنتن و بە یەکێک لە ناوەندە هەرە گرنگ و کولتوورییەکانی ئەمریکا دادەنرێت و لە 1963 ناوی کراوەتە سەنتەری جۆن کێنێدی.

 

سەنتەرەکە سێ هۆڵی سەرەکی و چەندین هۆڵی بچووکی تێدایە، ئەو کاتەی دروستکرا 70 ملیۆن دۆلاری تێچووە و توانای لە خۆ گرتنی زیاتر لە 7 هەزار کەسی هەیە.

 

لە رێوڕەسمی راکێشانی تیروپشکی مۆندیالی 2026 کە بۆ یەکەمجار 48 هەڵبژاردە بەشداردەبن، بۆ یەکەمجار خەڵاتێکی نوێ کە لەلایەن فیفاوە ئامادەکراوە بە ناوی ئاشتی فیفا پێشکێشدەکرێت و بە ئەگەری زۆرەوە خەڵاتەکە دەدرێتە دۆناڵد ترەمپ، سەرۆکی ئەمریکا.