تەکنەلۆژیایەکی نوێ لە مۆندیالی یانەکان بەکاردەهێنرێت

 

دوای رەزامەندی ئەنجوومەنی فیدراسیۆنی تۆپی پێی نێودەوڵەتی، ناوبژیوانان، لە یارییەکانی مۆندیالی یانەکانی 2026، کامێرایەک دەبەستن بۆ ئەوەی بینەر بتوانێت لە دیدگای ئەوانەوە حاڵەتەکان ببینێت و بەرچاوڕوونییەکی زیاتر ببەخشێت.

 

بەپێی سەرچاوەیەک، بینەرانی یاریگە دەتوانن لەڕێی شاشەی یاریگەکەوە بینەری دووبارەکردنەوەی حاڵەتەکان بن لە کامێرای ناوبژیوانەوە و لە کاتی بڕیاردانیش، هەمووان دەتوانن لە دیدگای ناوبژیوانەوە سەیری حاڵەتەکان بکەنەوە و گوێبیستی قسە و گفتوگۆی نێوان ناوبژیوانی سەرەکی و ژووری ڤار بن.

 

بەکارهێنانی ئەو تەکنەلۆژیا نوێیە وا لە یارییەکان دەکات بەشێوەیەکی دادپەروەرانە و روونتر بەڕێوەبچن و گومانەکان لەسەر ناوبژیوانان کەمتر ببنەوە، بەتایبەت دوای حاڵەتە مشتومڕهەڵگرەکانی وەرزی رابردوو لە خولەکانی ئەورووپا و چامپیۆنزلیگ، کە بوونە هۆی گلەیی بەشێک لە یانەکان.

 

لە جامی ئینتەرکۆنتینێنتاڵی رابردوو، فیفا یاسایەکی نوێی جێبەجێکرد و ناوبژیوانانی پەیوەستکرد بەوەی دوای هەر بڕیارێکی ڤار، لەڕێگەی بڵندگۆوە بڕیارەکەیان بۆ بینەران و یاریزانەکان روونبکەنەوە و دەکرێت ئەم تەکنەلۆژیایە تەواوکەری ئەوە بێت.

 

دەکرێت بۆ بابەتی پەروەردەیی و بۆ بەکارهێنانی لە ئەکادیمیاکانی تایبەت بە ناوبژیوانان، سوود لە ڤیدیۆ تۆمارکراوەکانی ناوبژیوانەکان ببینرێت.

 

جگە لە تۆپی پێ، پێشتر ئەو تەکنەلۆژیایە لە رەگبی و تۆپی پێی ئەمریکی بەکارهاتووە.