گارسیا داوای دوورخستنەوەی یاریزانێکی بارسێلۆنا دەکات
رووداو - دیجیتاڵ
خوان گارسیا، گۆڵپارێزی یانەی بارسێلۆنا چیدی بەرگەی هەڵەکان و ئاست نزمی یەکێک لە بەرگریکارانی تیپەکەی ناگرێت و داوادەکات چارەسەرییەکی گونجاو بدۆزرێتەوە بەر لەوەی کارەساتێک رووبدات.
گۆڵپارێزی بارسا گومان دەخاتە سەر ئاستی ژول کۆندێی بەرگریکاری فەرەنسی و دۆخی ژووری جلگۆڕینی تیپەکەی تێکدەدات.
لەنێو بارسێلۆنادا، گومان لەسەر ئاستی ئەو بەرگریکارە دەستی پێکردووە کە بڕیاربوو لەم قۆناخە یەکلاکەرەوەیەی وەرزدا جیاوازی دروست بکات.
خوان گارسیا یەکەم کەس بوو کە نیگەرانییەکانی خۆی دەربڕی و ئاماژەی بەوە کرد، کاتێک ژول کۆندێ لە پێکهاتەی سەرەکیدا بێت، تیپەکە هەست بە ئارامی ناکات. ئەو گۆڵپارێزە پێیوایە بوونی ئەو یاریزانە فەرەنسییە لە هێڵی بەرگریدا، لەبری ئەوەی ببێتە چارەسەر، دڵەڕاوکێ و ناجێگیریی زیاتر دروست دەکات.
دوایین یاریی بارسێلۆنا، کە بەرامبەر ریال مایۆرکا بوو، وەک خاڵێکی وەرچەرخان بۆ ئەم بابەتە دەبینرێت. هەرچەندە یارییەکە لەڕووی ئەنجامەوە بەئارامی کۆتاییهات، بەڵام هەڵە سادە و دووبارەبووەکانی کۆندێ گومانەکانی لەسەر ئاستی ئەو یاریزانە زیاترکرد، کە خەریکبوو سێ خاڵی یارییەکە لە سوودی بارسێلۆنا لەدەست بدات.
گۆڵپارێز خوان گارسیا، بەهۆی شوێنی یاریکردنییەوە، بینینێکی روونی بۆ تەواوی یارییەکە هەیە. ئەو هەست بەدڵنیایی تەواو ناکات کاتێک کۆندێ لەبەردەمیدایە. گارسیا پێیوایە ئەو بەرگریکارە سەرکێشیی بێ مانا دەکات و بەئاسانی شوێنی خۆی لەدەست دەدات، ئەمەش وا لە تیپەکە دەکات بەردەوام گۆڕانکاری لە شوێنی یاریزانەکاندا بکەن و هاوسەنگیی هێڵی بەرگری تێکبچێت.
بەپێی ئەو زانیارییانەی لەنێو ژووری جلگۆڕینەوە دزەیان کردووە، ئەمە تەنیا حاڵەتێکی کاتی نییە. نەبوونی متمانە بە کۆندێ کێشەیەکی دووبارەبووەوەیە لە هەر یارییەکدا کە بەشداری دەکات، تەنانەت بەرامبەر ئەو تیپانەی کە زۆر بەهێزیش نین. هەر بۆیە خوان گارسیا پێیوایە ئەمە کێشەیەکی سیستمییە لە ئاستی یاریزانەکەدا و تەنیا هەڵەیەکی تێپەڕ نییە.