گورزێکی کوشندە بەر ریال مەدرید کەوت

 

یانەی بایرن میونشنی ئەڵمانی بەسەرکەوتنێکی گرنگەوە لە یاریگای سانتیاگۆ بێرنابیۆ گەڕایەوە، دوای ئەوەی بەئەنجامی دوو گۆڵ بەرامبەر بە گۆڵێک لە ریال مەدریدی ئیسپانی بردەوە لە یاریی چوونی قۆناخی چارەکی کۆتایی خولی یانە پاڵەوانەکانی ئەورووپا. 

 

لەو یارییەدا ئاستی بەرگری ریال مەدرید هەڵەی کوشندەی بەخۆوە بینی و تیپە باڤارییەکە سوودی لە هەموو دەرفەتەکان وەرگرت، لەکاتێکدا یانە شاهانەکە تاکە گۆڵەکەی لەڕێگەی کیلیان ئێمباپێی فەرەنسییەوە تۆمارکرد، تاوەکو دەرگای سەرکەوتن بۆ یاریی گەڕانەوە بە کراوەیی بمێنێتەوە.

 

ئەوەی جێگەی نیگەرانییەکی زۆر بوو بۆ هاندەرانی ریال مەدرید ئەوەبوو کە دۆڕانەکە تەنیا ئاڵنگارییەک نەبوو، بەڵکو ریال مەدرید پێش یاریی گەڕانەوە لە یاریگای ئالیانز ئەرێنا گورزێکی کوشندەشی بەرکەوت، ئەویش بەهۆی بێبەشبوونی ئۆریلیان چوامینی، یاریزانی هێڵی ناوەڕاستی فەرەنسی، کە لە یاریی چووندا کارتی زەردی وەرگرت و بۆ یاریی داهاتوو راگیرا. 

 

ئەم دابڕانە بە زۆر کاریگەر دادەنرێت، بەتایبەت کە چوامینی هاوسەنگیی بەرگری بە هێڵی ناوەڕاست دەبەخشێت، نەبوونی ئەویش ئەرکی ئەلڤارۆ ئەربێلوای راهێنەر بەرامبەر هێرشە بەردەوامەکانی بایرن میونشن قورستر دەکات، هەر بۆیەش راهێنەری ریال مەدرید دوای ایرییەکە لە کۆنگرەی رۆژنامەڤانیدا رایگەیاند "کە یارینەکردنی چوامینی کێشەیەکی گەورەیە، دەبێت چارەسەرییەکی بۆ بدۆزنەوە".

 

چوامینی توخمێکی سەرەکی بوو لە سەقامگیریی هێڵی ناوەڕاستی یانە شاهانەکەدا و نەبوونی ئەو کاریگەریی راستەوخۆی هەبوو لەسەر توانای تیپەکە بۆ کۆنترۆڵکردنی رەوتی یارییەکە. بۆیە ریال مەدرید پێویستی بە رێکخستنەوەی تاکتیک و پەستانی بەرگری زیاتر دەبێت بۆ قەرەبووکردنەوەی ئامادەنەبوونی  یاریزانەکەی لە یاریی گەڕانەوەدا، تاوەکو هەوڵ بدات ئەنجامەکە لە بەرژەوەندی خۆی لە ئالیانز ئەرێنا سەرەوژوور بکاتەوە.