ئەمشەو بە یارییەکی لووتکە قۆناخی پێشکۆتایی مۆندیال دەستپێدەکات

 

 

لە یەکەم یاریی ئەم قۆناخەدا ئەمشەو کاژێر 22:00 لەسەر یاریگەی مێت لایڤ هەردوو یانە رووبەڕووی یەکدەبنەوە و رکابەری لەسەر گەیشتن بە یاریی کۆتایی پاڵەوانێتییەکە دەکەن.

 

چێڵسی و فلومینێنسی رۆژی دووشەممە دوایین مەشق و ئامادەکارییەکانیان بۆ یارییەکە ئەنجامدا و بۆ یارییەکە ئامادەن، یانە لەندەنییەکە لە مۆندیالی یانەکاندا 5 یاریی کردووە، سێ یارییان بەرامبەر یانە بەرازیلییەکان بووە، لە قۆناخی کۆمەڵەکاندا بەرامبەر فلامینگۆ دۆڕا، لە قۆناخی رابردوودا پاڵمێراسی کردە دەرەوە و ئەمشەویش رووبەڕووی فلومینێنسی دەبێتەوە.

 

یانەی فلومینێنسی تاکە یانەی ئەمریکای باشوورە لە پاڵەوانێتییەکەدا ماوە و دەیەوێت درێژە بە سەرکێشییەکانی بدات دوای ئەوەی لە قۆناخی رابردوودا سەرکەوتنی بەرامبەر یانەی هیلالی سعودی بەدەستهێنا و خۆی گەیاندە قۆناخی پێشکۆتایی پاڵەوانێتییەکە.

 

فلومینێنسی لە پێنج یاریی رابردووی مۆندیالی یانەکاندا هیچ یارییەکی نەدۆڕاندووە و دەیەوێت لەسەر هەنگاوە مێژووییەکانی بەردەوامبێت.

 

ئەم یارییە تایبەت و سەرنجڕاکێش دەبێت بۆ تیاگۆ سیلڤا، کاپتنی یانەی فلومینێنسی، کاتێک رووبەڕووی یانەی پێشووی دەبێتەوە، لەکاتێکدا پێشتر لە 2020 تاوەکو 2024 یاریزانی یانەی چێڵسی بووە و دوایین یانە بوو لە ئەورووپا یاریی بۆ کردبێت.