سەڵاح دەیەوێت دوای 3 پاڵەوانێتی میسر بگەیێنێتە قۆناخی پێشکۆتایی

 

 

رۆژی هەینی هەڵبژاردەی میسر دوایین مەشقەکانی بەسەرکردایەتیی محەممەد سەڵاح ئەنجامدا و تیپەکە دەیەوێت لەنێو رکابەرییەکەدا بەردەوامبێت، هەڵبژاردەکە لە قۆناخی رابردوودا بە سێ گۆڵ بەرامبەر گۆڵێک لە بەنینی بردەوە و گەیشتە ئەم قۆناخەی پاڵەوانێتییەکە و ئەمشەو کاژێر 22:00 رووبەڕووی کۆتدیڤوار دەبێتەوە.

 

میسر لە دوای 2017ـەوە نەگەیشتووەتە قۆناخی پێشکۆتایی جامی ئەفریقا و لە سێ پاڵەوانێتی رابردوودا لە قۆناخی شازدە کراوەتە دەرەوە، بۆیە تیپەکە نایەوێت بۆ چوارەمجار لەسەریەک لەم قۆناخەدا بکرێتە دەرەوە.

 

هەڵبژاردەی کۆتدیڤوار، پاڵەوانی جامی ئەفریقای رابردوو بەباشی خۆی بۆ ئەم یارییە ئامادەکردووە و دەیەوێت بگاتە قۆناخی داهاتووی پاڵەوانێتییەکە.

 

فرانک کیسێ و هاوڕێکانی رۆژی هەینی بە ئارامییەکی زۆرەوە دوایین مەشقەکانیان ئەنجامدا، لە قۆناخی رابردووشدا بە ئاسانی لە بۆرکینا فاسۆیان بردەوە و گەیشتنە ئەم قۆناخەی پاڵەوانێتییە.

 

هەردوو هەڵبژاردە لە مێژوودا 21 یارییان بەرامبەر یەکدی کردووە، میسر خاوەنی 11 سەرکەوتنە، کۆتدیڤوار 6 یاریی بردووەتەوە و 4 یاریی نێوانیان بە یەکسانبوون کۆتاییهاتووە.

 

براوەی ئەم یارییە لە قۆناخی پێشکۆتاییدا بەرامبەر هەڵبژاردەی سەنیگال یاریی دەکات.