خولی نایابی کوردستان بەهۆی شەڕ و ئاژاوە راگیرا
رووداو - هەولێر
خولی یانە نایابەکانی کوردستان بەهۆی ئەو شەڕ و ئاژاوانەی لە خولەکەدا روودەدات بۆ ماوەیەکی نادیار راگیرا.
یەکێتی تۆپی پێی کوردستان لە بەیاننامەیەکی فەرمیدا راگرتنی خولەکەیە، بەهۆی ئەو شەڕ و ئاژاوانەی لە ماوەی رابردوودا لە دوای کۆتاییهاتنی یارییەکان روودەدات بڕیاریدا یارییەکانی خولەکە بۆ ماوەیەکی نادیار دوابخات.
لە بەیاننامەکەدا یەکێتی تۆپی پێی کوردستان بانگهێشتی سەرجەم یانە بەشداربووەکان دەکات، رۆژی 13-4-2019 لەبارەگای یەکێتی تۆپی پێی کوردستان ئامادەبن، بۆ کۆبوونەوەیەکی گرنگ و قسەکردن لەسەر چارەنووسی خولەکە.
راگرتنی خولی یانە نایابەکانی کوردستان لەکاتێکدایە کە ئەم وەرزە چەندینجار شەڕ و ئاژاوە لە یاریگەکاندا روویداوە، دوایینجاریش لەدوای یاریی نێوان هەردوو یانەی دهۆک و ئاکرێ لە گەڕی 20ـی خولەکەدا شەڕ و ئاژاوەیەکی گەورە روویدا.