ئەلۆنسۆ مەشقدانی ریال مەدریدی بە هەڵە گەورەکەی ژیانی ناوبردووە

 

میدیای ئیسپانیا ئاشکرایانکردووە، ئەلۆنسۆ کاتێک هەواڵی بەشەڕهاتنی ڤاڵڤێردی و چوامینی بیستووە، بەخۆشحاڵییەوە رایگەیاندووە کە باشە لەو کاتەدا لەوێ نەبووە و نەگەیشتووەتە ئەوەی، شەڕی دەستەویەخەی یاریزانەکانی ببینێت.

 

ئەلۆنسۆ لە مانگی یەکی ئەمساڵ و پاش چەند مانگێکی کەم لە مەشقدانی ریال مەدرید دوورخرایەوە، پاشئەوەی روون بووەوە ژمارەیەک یاریزانی تیپەکە، پشتگیریی ئەو راهێنەرە ناکەن.

 

لە مەشقەکانی رۆژی پێنجشەممەی رابردووی ریال مەدرید، چوامینی و ڤاڵڤێردی دوای مەشقەکان بووە دەمەقاڵەیان و فیدریکۆ بەپەلە گواسترایەوە نەخۆشخانە، پاشئەوەی گورز بەر سەری کەوت.

 

میدیای ئیسپانیا دەڵێن، ئەلۆنسۆ دوای بڵاوبوونەوەی هەواڵی شەڕەکە، بەنزیکەکانی خۆی گوتووە، باشبوو تاوەکو ئێستا لە یانەکە نەمامەوە و ناچارنەبووم مامەڵە لەگەڵ ئەو تەقینەوە گەورەیەی ژووری جلگۆڕینی یانەکەدا بکەم.

 

ئەو سەرچاوانە دەڵێن، ئەلۆنسۆ کە هەوڵیداوە رێوشوێن و رێککاری لە ژووری یاریزانانی ریال مەدریدا بسەپێنێت، هەرزوو لەوە تێگەیشتووە کە ئاڵنگارییەکی گەورە چاوەڕێی دەکات، چونکە رووبەڕووی ناڕەزایەتی یاریزانان بووەتەوە و بۆی دەرکەوتووە تیپەکە دابەشبوون و ناکۆکیی قووڵی تێدایە و سەرکردەی نەماوە، پاشئەوەی نەوەی زێڕینی تیپەکە رۆیشتن.

 

ریال مەدرید وەرزێکی پڕاوپڕ لە کێشە و گرفت و ئەنجامی خراپی بەڕێدەکات، تیپەکە لەسەرجەم پاڵەوانێتییەکان دەستبەتاڵ دەرچوو، ئەوە دووەم وەرزی لەسەریەکە هیچ نازناوێک ناباتەوە.