خولی پلە یەکی تورکیا بەبەشداریی دوو یانەی کوردستان دەستپێدەکات

 

 

یانەی ئامەدسپۆر بەنێوبانگترین یانەی باکووری کوردستانە، بۆ وەرزی دووەم لەسەریەک لە خولی پلە یەکی تورکیادا یاری دەکات و ئەمشەو لە گەڕی یەکەمی خولەکەدا لە دەرەوەی یاریگەی خۆی بەرامبەر یانەی چۆروم یاری دەکات.

 

بەر لە دەستپێکردنی رکابەرییەکانی وەرزی نوێ، یانەکەی باکووری کوردستان گۆڕانکاریی گەورەی لە تیپەکەیدا ئەنجامدا و چەند یاریزانێکی نوێی گواستووەتەوە، دیارترینیان دیا سابای ئیسرائیلی و یاریزانی پێشووی یانەی ماکابی حەیفایە.

 

رۆژی شەممە یانەکە گرێبەستێکی دیکەی راگەیاند و رێککەوتنی لەگەڵ مبای دیانێ کرد، کە هێرشبەرێکی سەنیگالییە و پێشتر لە گاڵاتەسەرای، وێستبرۆمیچ، کلەب برووج و چەندین یانەی گەورە یارییکردووە و رۆژی سێشەممە گرێبەستەکەی واژۆ دەکات.

 

ئامەدسپۆر بۆ ئامادەکارییەکی باش، کەمپێکی مەشق و راهێنانی لە بۆلۆ ئەنجامدا و چەند یارییەکی دۆستانەشی کرد، ئەمشەو کاروانی تیپەکە لە وەرزی نوێی خولی پلە یەکی تورکیادا دەستپێدەکات و دەیەوێت بەبردنەوە بچێتە نێو رکابەرییەکانی خولەکەدا.

 

یانەی وان سپۆری باکووری کوردستان، بۆ یەکەمجار لە رکابەرییەکانی خولی پلە یەکی تورکیادا یاری دەکات و لە یەکەم دەرکەوتنیدا لە دەرەوەی یاریگەی خۆی یاری دەکات.

 

وەرزی رابردوو وان سپۆر لە قۆناخی پلەی ئۆفدا سەرکەوتنی بەدەستهێنا و بۆ یەکەمجار لە مێژوویدا خۆی گەیاندە خولی پلە یەکی تورکیا، ئەمڕۆ کاروانی یانە کوردستانییەکە دەستپێدەکات و لە دەرەوەی یاریگەی خۆی بەرامبەر یانەی بۆلو سپۆر یاری دەکات.

 

وان سپۆر بۆ ئەم وەرزە چەند گۆڕانکارییەکی لە تیپەکەیدا کردووە، دیارترین یاریزان کە گرێبەستی لەگەڵ کراوە ئیڤان سێدریک، یاریزانی کامیرۆنی و پێشووی یانەی بارسێلۆنایە و یانە کوردستانییەکە دەیەوێت بەبردنەوەی یەکەم سێ خاڵ بچێتە نێو رکابەرییەکانی خولەکە.

 

بەر لە دەستپێکردنی خولەکە، وان سپۆر کەمپێکی مەشق و راهێنانی لە ئێرسیێ ئەنجامدا و چەند یارییەکی دۆستانەشی کرد، ئەمڕۆ یانەکە مێژووییەکی نوێ لە تۆپی پێی تورکیادا دەنووسێتەوە.

 

یاریی نێوان هەردوو یانەی بۆلو سپۆر و وان سپۆر کاژێر 19:00 بەڕێوەدەچێت و کاژێر 21:30 ئامەدسپۆر لە دەرەوەی یاریگەی خۆی بەرامبەر چۆروم یاری دەکات.