یەکەم بڕیاری ئەربێلوا دەرکردنی ئەستێرەیەکە

 

مەدریدستاکان، ئاگاداربن! دۆخەکە لەناو قەڵای سپی گۆڕانکاری ریشەیی بەخۆوە دەبینێت. ساڵی 2026 بۆ ریال مەدرید بەتاقیکردنەوەیەکی سەخت دەستیپێکرد؛ دوای زنجیرەیەک ئەنجامی خراپ و ونبوونی ناسنامەی تیپەکە لەناو یاریگەدا، کارگێڕیی یانەکە بڕیاری 'نەشتەرگەرییەکی بەپەلە' یان دا.

 

 

لەکاتێکدا بارسێلۆنای رکابەری مێژوویی لە هەموو ئاستەکاندا باڵادەستە و پێشەنگە، ژووری جلگۆڕینی ریال مەدرید دووچاری جۆرێک لە بێسەروبەری ببووەوە. لێرەدا کارگێڕیی فلۆرێنتینۆ پێرێز بڕیارێکی یەکلاکەرەوەیان دا بە راسپاردنی ئەرکی راهێنەرایەتی بە کوڕی یانەکە، ئەلڤارۆ ئەربێلوا.

 

 

ئەربێلۆی تەمەن 42 ساڵ، کە بە 'پاتریۆت' و کادیری دڵسۆزی مەدرید دەناسرێت، بە فەلسەفەیەکی تووند و بێبەزەییانە دەستیپێکردووە. پەیامەکەی بۆ یاریزانەکان روونە "کەس لە یانەکە گەورەتر نییە". ئەو دەیەوێت شکۆ و هەیبەت بۆ درێسی سپی بگەڕێنێتەوە و کۆتایی بە نازی هەندێک لە ئەستێرەکان بهێنێت.

 

 

بەپێی زانیارییەکانی رۆژنامەی ئیستادیۆ دیپۆرتیڤۆ، یەکەم یاریزان کە باجی ئەم شۆڕشە دەدات دانی سیبایۆسە. ئەربێلۆ بەڕاشکاوی پێیگوتووە کە لە پلانەکانیدا نییە و بڕیارە لە مێرکاتۆی زستانەدا بگەڕێتەوە بۆ یانەی ریال بێتیس.

 

لە بەرامبەردا ئەربێلوا دەرگای بۆ گەوهەرەکانی ئەکادیمیای لا فابریکا واڵا کردووە. چاوەکان هەمووی لەسەر دوو ناوی درەوشاوەن: تیاگۆ بیتارش و بێتۆ مارتینێز. ئەربێلۆ بڕوای وایە ئەم لاوانە بەڕۆحیەت و جەنگاوەریی خۆیان دەتوانن مێرێنگی بگەڕێنەوە سەر رێڕەوی راستەقینە.

 

ئایا ئەربێلوا دەبێتە 'زیدانێکی نوێ' و ریال مەدرید لەم تەنگەژەیە رزگار دەکات؟ یان گوشارەکان رێڕەوی شۆڕشەکەی دەگۆڕن؟ ئەوەی ئێستا دەبینرێت، مەدریدێکی جیاواز و تووندترە لەوەی پێشوو.