هەڵەیەک روویدا! دووبارە هەوڵبدە
رووداو دیجیتاڵ
یانەی ریال مەدرید لە نێو یاریگە و هاندەرانی سەرکەوتنێکی گەورەی بەدەستهێنا و بە ئەنجامی 4-1 لە یانەی ریال سۆسیدادی بردەوە، ڤینیسیۆس جونیۆر ئەستێرەی یەکەمی یارییەکە بوو و دوو گۆڵی تۆمارکرد، مێرەنگی بەم سەرکەوتنە باڵادەستی خۆی لە لالیگا پێشاندا.
لە چوارچێوەی یارییەکانی لالیگا، ریال مەدرید لە یاریگەی سانتیاگۆ بێرنابیۆ میوانداری ریال سۆسیدادی کرد، کوڕانی ئەلڤارۆ ئەربێلوا لە سەرەتای یارییەکەوە بە گوشارێکی زۆرەوە دەرکەوتن، تەنیا 5 خولەک بەسەر دەستپێکی یارییەکە تێپەڕی، گۆنزالۆ گارسیای یاریزانی لاو دوای وەرگرتنی پاسێکی جوانی ئەلیکساندەر ئارنۆڵد، دەرگای گۆڵ تۆمارکردنی کردەوە و مەدریدی پێشخست.
ریال سۆسیداد هەوڵی گەڕانەوەی بۆ نێو کەشی یارییەکە دا، لە خولەکی 21 میکێل ئۆیارزابال لە رێگەی لێدانی سزا ئەنجامەکەی یەکسانکردەوە، بەڵام خۆشییەکەی میوانەکان زۆری نەخایاند، تەنیا 4 خولەک دوای ئەوە، ڤینیسیۆس جونیۆر بە لێدانی سزا جارێکی دیکە ریال مەدریدی پێشخست، باڵادەستی مێرەنگی بەردەوام بوو، لە خولەکی 31 فێدێریکۆ ڤاڵڤێردی دوای پاسێکی ئالڤارۆ کارێراس گۆڵی سێیەمی تۆمارکرد و نیوەی یەکەم بەو ئەنجامە کۆتاییهات.
لە سەرەتای نیوەی دووەمدا، ریال مەدرید هێرشەکانی چڕکردەوە، لە خولەکی 48 ڤینیسیۆس جونیۆر جارێکی دیکە لە رێگەی لێدانی سزا گۆڵی دووەمی خۆی و چوارەمی تیپەکەی تۆمارکرد، ئەلڤارۆ ئەربێلوا لە نیوەی دووەمدا بە هێنانە ناوەوەی یاریزانانی یەدەگ وەک ئالابا، کارڤاخال، سیبایۆس و برایم دیاز، توانی پارێزگاری لە هێزی تیپەکەی بکات.
ئامارەکانی یارییەکە گوزارشت لە باڵادەستی ریال مەدرید دەکەن، ریال مەدرید 15 لێدانی هەبوو 7 لێدانیان بۆ نێو گۆڵ بوون، لە کاتێکدا سۆسیداد تەنیا 9 لێدانی هەبوو، وردی پاسەکانی ریال مەدرید گەیشتە 87%، ئەمەش نیشانەی کۆنترۆڵی تەواوی یارییەکەیە.
لە هەڵسەنگاندنی یاریزانەکاندا، ڤینیسیۆس جونیۆر بە نمرەی 9.3 بە باشترین یاریزانی یارییەکە دەستنیشانکرا، فێدێریکۆ ڤاڵڤێردی نمرەی 8.3 و ئالڤارۆ کارێراس نمرەی 8.1ـیان بەدەستهێنا، لە بەرامبەردا رێمیرۆی گۆڵپارێزی سۆسیداد نزمترین ئاستی هەبوو و نمرەی 4.8ـی پێدرا.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ